Facebook սոցիալական ցանցում Երևանի Բաղրամյան և Պռոշյան փողոցների բնակիչների կողմից մեծ աղմուկ է բարձրացվել. նրանք բողոքում են, որ Երևանի Բաղրամյան 21 հասցեում Սոֆի Դևոյանի և պարսկահայ ընտանիքի կողմից կառուցվող շենքի ապագա «մանսարդը» իրենց տները զրկելու է արևից: Այս մասին տեղեկացնում է «Խոսքի իրավունք» միավորումը:
Քաղաքապետի Facebook-յան էջում տեղադրված բնակիչների հաղորդագրություններում նշվում է, որ նախկին Երքաղխորհրդի նվագախմբի շենքի տարածքը (292.0 քմ) Երևանի քաղաքապետի 2001 թվականի մարտի 19-ի թիվ 243 որոշմամբ տրամադրվել է «Սոֆի Դևոյանի պարի և հոգու թատրոն» ՊՓԲ ընկերությանը: Այնուհետև, անհասկանալի ձևով, 2004թ. նշված հողամասը առուվաճառքի պայմանագրով ձեռք է բերվել Արա Սուքիասյան Սալմասի կողմից (ըստ նոր սեփականատիրոջ բառերի` մեկ հարկ Սոֆի Դևոյանին տրամադրելու պայմանով):
«Խոսքի իրավունք» միավորումը տարակուսանք է հայտնում, որ հասարակական նշանակության օբյեկտ հանդիսացող նվագախմբի շենքը Երևանի քաղաքապետի որոշմամբ 2001թ. տրամադրվել է մեկ այլ հասարակական նշանակության օբյեկտի` «Սոֆի Դևոյանի պարի և հոգու թատրոնին», սակայն հետագայում վերավաճառվել է՝ բնակելի շենք կառուցելու համար:
Պարզելու համար` ի՞նչ հիմքերով է դա կատարվել,
միավորումը դիմում է դատախազությանը` շինարարական և տեխնիկական փորձաքննության ենթարկել Սոֆի Դևոյանի և պարսկահայերի կառուցվող բնակելի շենքը: Այդ ընթացքում, միավորման համոզմամբ, ճիշտ կլինի, որ քաղաքապետարանն արգելի Բաղրամյան 21 հասցեում հարևանների լույսի հաշվին «մանսարդի» շինարարությունը:
Լուսանկարը` Bravo.am-ի
