ՄԱԿ-ի և Amnesty International միջազգային իրավապաշտպան կազմակերպության տվյալներով` Հյուսիսային Աֆրիկայում և Մերձավոր Արևելքում տեղի ունեցած զանգվածային հուզումների և հեղափոխությունների հետևանքով զոհվել է շուրջ 29 հազար մարդ:
Ինչպես հաղորդում է Reuters գործակալությունը, ՄԱԿ-ի տվյալներով` Սիրիայում ժողովրդական հուզումների սկսվելու պահից մինչ այժմ զոհվել են առնվազն 2700 խաղաղ քաղաքացիներ, այդ թվում՝ 100 երեխա: Տեղի իրավապաշտպան կազմակերպությունների տվյալներով` զոհերի թիվը հասնում է 5000-ի:
Լիբիայի նոր իշխանությունները տեղեկացրել են, որ վերջին 6 ամիսների ընթացքում կառավարական զորքերի հետ բախումների ընթացքում զոհվել է 25 հազար, վիրավորվել՝ 50 հազար մարդ:
Պաշտոնական տեղեկությունների համաձայն` Թունիսում և Եմենում անկարգությունների պահից սկսած զոհվել է 200 խաղաղ քաղաքացի, Եգիպտոսում` 850:
2010թ. վերջին Թունիսում բռնկված հուզումները և բողոքի ակցիաները ընդգրկեցին նաև Եգիպտոսը, Ալժիրը, Հորդանանը Եմենը, Սիրիան, Բահրեյնը, Լիբիան: Բողոքի ավելի փոքր ակցիաներ տեղի ունեցան Մավրիտանիայում, Սաուդյան Արաբիայում, Օմանում, Սուդանում, Իրաքում, Քուվեյթում, Լիբանանում, Սոմալիում, Մարոկկոյում, Արևմտյան Սահարայում և Ջիբութիում:
Որպես ժողովրդական հուզումների հիմնական պատճառներ նշվում են կոռուպցիան, աղքատությունը, անհավասարությունը, գործազրկությունը, հնացած վարչակարգերը և այլ գործոններ:
Արաբական հեղափոխությունների սկիզբ է համարվում 2010թ. դեկտեմբերի 17-ը, երբ Թունիսում ինքնահրկիզվեց բանջարեղենի վաճառական Մոհամմեդ Բուազիզին:
