Վաղը`հոկտեմբերի 5-ին, Գաֆէսճեան արվեստի կենտրոնում տեղի կունենա ֆրանսիացի հայտնի երգչուհի Էլոդի Ֆրեժեի բացօթյա համերգը:
Համերգը, որը կրում է «20 երգ 20-ամյա Հայաստանին» խորագիրը, Ֆրանսիայի նվերն է Հայաստանի անկախության 20-ամյակի կապակցությամբ: Համերգին ելույթ կունենան նաև հայ կատարողները` Էմմա Պետրոսյանը, Արամոն, Սուրեն Առուստամյանը, Էվա Սուջյանը, Էրիկը և այլք: Նրանք կկատարեն ֆրանսիական սիրված ու հայտնի երգեր: Վերջիններիս կնվագակցի ՀՀ հանրային հեռուստատեսության և ռադիոյի էստրադային սիմֆոնիկ նվագախումբը:
Համերգն իրականացվում է Հայաստանում Ֆրանսիայի դեսպանատան նախաձեռնությամբ։
Էլոդի Ֆրեժեն 2003 թ. ճանաչվել է Ֆրանսիայի աստղերի ակադեմիայի հաղթող, ապա հրապարակել իր անվանական Elodie Frégé ալբոմը: Երգչուհին երգում է հիմնականում փոփ ոճում: Նրա երգացանկի հայտնի հիթեր են “De L’eau” (Ջուրը), “Viens jusqu’à moi” (Եկ ինձ մոտ), “Le Jeu des 7 Erreurs” (Գտիր 7 տարբերություն) և La Femme De L’apres Midi (Կինը կեսօրից հետո) սինգլները:
ՀՀ կառավարությունն այս միջոցառումը պաշտոնապես ներառել է Հայաստանի անկախության 20-րդ տարեդարձի գլխավոր տոնակատարությունների ծրագրում: Համերգը կնախորդի Ֆրանսիայի նախագահ Նիկոլա Սարկոզիի՝ Հայաստան կատարելիք պաշտոնական այցին:
Երգչուհին առաջին անգամ է ժամանում Հայաստան:
