Սոցիոլոգ Գևորգ Պողոսյանը կարծում է, որ Ազատության հրապարակում ընթացող Հայ ազգային կոնգրեսի շուրջօրյա հանրահավաքները, ինչպես նաև Ռոբերտ Քոչարյանի` քաղաքականություն վերադառնալու մասին ԲՀԿ առաջնորդ Գագիկ Ծառուկյանի հայտարարությունը Հայաստանում մեկնարկած նախընտրական գործընթացների լավագույն վկայությունն են: Նման տեսակետ նա հայտնեց «Առաջին լրատվական»-ի հետ զրույցում:
Սոցիոլոգի կարծիքով՝ վերոնշյալ երևույթները «նորմալ նախընտրական վիճակներ են», որոնք իշխանության և ընդդիմության ներկայացուցիչներին թույլ են տալիս առավել պարզ ու հստակ դարձնել իրենց դիրքորոշումները: «Բնական է, որքան ընտրությունները մոտենում են, այնքան քաղաքական իրավիճակն ավելի է լարվում, և իշխանության ու ընդդիմության հարաբերություններն էլ ավելի են բարդանում»,- նկատեց Գևորգ Պողոսյանը:
Նա նաև տեսակետ հայտնեց, որ ՀԱԿ-ի շուրջօրյա հանրահավաքները, սահմանված ժամկետում ավարտվելուց հետո, որոշ ժամանակ անց կրկնվելու լուրջ հավանակություն ունեն: «Հասարակական դժգոհությունը կա, և այն շատ բարձր մակարդակի վրա է: Մարդկանց միայն ուղղորդող ուժ է հարկավոր»,- նկատեց սոցիոլոգը:
Գևորգ Պողոսյանը, վկայակոչելով սեփական սոցհարցումները, միաժամանակ հավաստիացրեց, որ Ռոբերտ Քոչարյանի` քաղաքականություն վերադառնալու պատճառով կընդվզի հասարակության մի փոքր հատվածը միայն, մինչդեռ մեծամասնությունը հանգիստ կվերաբերվի դրան:
Հիշեցնենք, որ երեկ` հոկտեմբերի 3-ին, ԲՀԿ առաջնորդ Գագիկ Ծառուկյանը հայտարարել էր, թե Ռոբերտ Քոչարյանն ունի քաղաքականություն վերադառնալու բարոյական և քաղաքական իրավունքը:
Հիշեցնենք նաև, որ արդեն չորրորդ օրն է, ինչ ՀԱԿ-ն Ազատության հրապարակում շուրջօրյա հանրահավաքներ է անցկացնում: Դրանք, նախապես հայտարարվածի համաձայն, տևելու են ևս 3 օր:
