Ucom ընկերության տնօրեն Հայկ Եսայանը և «Այքան Քոմունիքեյշնս» ՓԲԸ-ի գլխավոր գործադիր տնօրեն Րաֆֆի Քասարջյանն այսօր ասուլիսում հայտարարեցին ընկերությունների միավորման մասին` Ucom բրենդի ներքո: Հ. Եսայանի խոսքով՝ Ucom-ն արդեն 3 տարի ծառայություններ է մատուցում ֆիքսված կապի, իսկ Icon-ը` wimax կապի միջոցով:
«Այս երկու ընկերությունների միավորումը կտա quarter play ծառայությունների հնարավորություն, կունենանք նոր լուծումներ, նոր առաջընթաց: Սա ողջունելի է և՛ մեր շուկայում զարգացումները տեսնելով, և՛ մեր բաժանորդների համար»,- ասաց Հ. Եսայանը:
Ր. Քասարջյանը նշեց, որ Icon-ը եղել է Հայաստանում ինտերնետի անլար միացման հեղափոխության առաջամարտիկը. «Հիմա միանում ենք լարային հեղափոխություններին Հայաստանում»: Նա իրենց հաճախորդներին հավաստիացրեց, որ նույն որակով ծառայություն կստանան, միայն ընտրության շրջանակը կմեծանա: Այս պահին Icon-ը ծածկում է քաղաքի 75%-ը, սակայն հնարավորություն ունի 100%-ով ծածկույթ ապահովել, ունի 4000 բաժանորդ: Icon-ի աշխատակիցները շարունակելու են աշխատել Ucom-ում:
Հ. Եսայանը հայտնեց, որ դիմելու են Հանրային ծառայությունները կարգավորող հանձնաժողովին` Icon-ի բաժնետոմսերը 100%-ով Ucom-ին փոխանցելու համար, տեխնիկական աշխատանքներն ավարտելուց հետո լինելու է մեկ ընդհանուր ընկերություն: Գործարքի գինը չհրապարակվեց:
Պատասխանելով «Առաջին լրատվական»-ի հարցին, թե ոչ վաղ անցյալում Ucom-ը ձեռք բերեց «Նետսիս» ընկերությունը, այժմ` Icon-ը, ո՞րն է լինելու հաջորդը և ի՞նչ ծրագրեր ունի ընկերությունը, Հ. Եսայանը նշեց, որ Icon-ի հետ միավորվելու հարցն ավելի վաղ են սկսել քննարկել, բայց ինչ-ինչ պատճառներով «Նետսիս»-ի հետ գործարքն ավելի շուտ եղավ. «Այս պահին որևէ այլ ընկերության հետ բանակցություններ չկան, կուզենայինք լիներ, բայց այս պահին չկան»:
Նշենք, որ սա, թերևս, առաջին դեպքն է, որ հայկական կապիտալով ընկերությունը կլանում է արտասահմանյան գրանցում ունեցող ընկերության: Icon-ը գրանցված է Դուբայում:
