«Նոր ժամանակներ» կուսակցության նախագահ Արամ Կարապետյանը «Առաջին լրատվական»-ի հետ զրույցում կարծիք հայտնեց, որ ԵԱՀԿ-ն՝ որպես կազմակերպություն, Աստանայի գագաթնաժողովից հետո ցույց տվեց, որ որևէ խնդիր չի լուծում: Նա կարծում է, որ այսօր գերտերությունները ձգտում են ԼՂ հակամարտության հարցը կարգավորել տարածքային ամբողջականության և ազգերի ինքնորոշման սկզբունքները համատեղելու միջոցով, ինչն անհնարին է: «Այդ իրարամերժ սկզբունքները չեն կարող հանգեցնել հարցի լուծման: Այդ սկզբունքները կիրառելու դեպքում մեկն անպայման պետք է գնա զիջման և պարտվի: Դրա համար էլ Հայաստանի և Ադրբեջանի մանևրելու ռեսուրսները գնալով սպառվում են: Դրանից հետո աճելու է միլիտարիզացիայի հռետորիկան»,- ասաց Արամ Կարապետյանը: ՆԺԿ նախագահը կարծիք հայտնեց, որ ներքին խնդիրները այնքան շատ են, որ արմատական ընդդիմությունը չպետք է սպասի, թե ԼՂ հակամարտության խնդիրը ինչ փուլում կհայտնվի: Արամ Կարապետյանը նշում է, որ հիմա ժամանակն է մտածելու` պատերազմ լինելու՞ է, թե՞ ոչ, ու՞մ է դա ձեռնտու: Արամ Կարապետյանը ուշագրավ է համարում, որ Սերժ Սարգսյանը հրամանագիր է ստորագրել և ՆԱՏՕ-ում ՀՀ ներկայացուցիչ Սամվել Մկրտչյանին ազատել ՀՀ առաքելության ղեկավարի պարտականություններից: «Ինչու՞ է փոխել: Գուցե նա ինչ-որ բա՞ն է իմացել ՆԱՏՕ- Հայաստան փոխհարաբերությունների մասին»,- հարցնում է ՆԺԿ նախագահը: ՆԺԿ նախագահին մտահոգում է, որ լարվում են նաև Վրաստանի հետ մեր հարաբերությունները, ինչը վտանգ է պարունակում:
Լուսանկարը` PanArmenianPhoto-ի
