Ուկրաինացի պաշտոնյան տուգանք չվճարելու համար ներկայացրել է մի տեղեկանք, համաձայն որի նա գոյություն չունի: Այս մասին հաղորդում է УНИАН գործակալությունը: Խաբեբային բացահայտել են, որից հետո տուգանքի գումարն ավելացել է մի քանի անգամ:
Ամեն ինչ սկսվել է այն բանից, որ Ուկրաինայի շրջաններից մեկի շրջխորհրդի քարտուղարներից մեկին սանիտարահիգիենիկ վարչությունը տուգանել էր մոտ 8000 դրամով: Այդ գումարը նա չի վճարել, որից հետո տուգանքի գումարը կրկնապատկվել է: Սահմանված տույժը չվճարելու համար նա կեղծ տեղեկանք է ներկայացրել համապատասխան մարմիններին, որ իր անուն-ազգանունով մարդ տվյալ գյուղի տարածքում չի բնակվում: Կնիքն էլ վերցրել է գյուղական համայնքի ղեկավարից:
Այս կեղծիքը բացահայտվել է այն ժամանակ, երբ դատախազությունը պարզել է, որ իրականում այդ մարդը նույն շրջխորհրդի քարտուղարն է, որից հետո նշանակվել է տուգանք` նախկինի քառապատիկի չափով: