Ադրբեջանական APA լրատվական գործակալության փոխանցմամբ՝ ԵԽԽՎ թուրք նախագահ, Թուրքիայի իշխող «Արդարություն և զարգացում» կուսակցությունը (ԱԶԿ) ներկայացնող Մևլյութ Չավուշօղլուն հոկտեմբերի 10-ին այցելելու է Ադրբեջան։ Չավուշօղլուն մասնակցելու է մարդու իրավունքների վերաբերյալ Բաքվում կայանալիք միջազգային կոնֆերանսին։
Չավուշօղլուն նաև ողջունել է վերջին շրջանում Ադրբեջանում քաղբանտարկյալների և լրագրողների ազատարձակումը և հույս հայտնել, որ այդ երկրի գծով ԵԽԽՎ զեկուցող Քրիստոֆեր Շտրասերը վերջապես Ադրբեջան այցելելու անցագիր կստանա։
Հիշեցնենք, որ օգոստոսի կեսերին ադրբեջանական կողմը հրաժարվել էր մուտքի արտոնագիր տրամադրել Ադրբեջանում քաղբանտարկյալների հարցով ԵԽԽՎ-ի հատուկ զեկուցող, գերմանացի պատգամավոր Քրիստոֆ Շտրասերին վերջինիս «մանդատի պատճառով»։ Ադրբեջանի արտգործնախարարության ներկայացուցիչ Էլման Աբդուլաևը հայտարարել է.
«Գերմանիայի ցանկացած քաղաքացի կարող է այցելել Ադրբեջան: Բայց Ադրբեջանում չկա այնպիսի հասկացություն, ինչպիսին է «քաղբանտարկյալը»: ԵԽԽՎ-ն փորձում է այս ձևակերպումը կիրառել Ադրբեջանի նկատմամբ: Շտրասերի այցն անիմաստ է համարվել՝ ելնելով դրա նպատակներից: Մենք կարծում ենք, որ նրա մանդատը նման ձևակերպումներով բնութագրելն Ադրբեջանի նկատմամբ խտրական վերաբերմունքի դրսևորում է»: