Թուրքիայի նախագահ Ռեջեփ Թայիփ Էրդողանը պլանավորում է հանդիպել ԱՄՆ նախագահ Դոնալդ Թրամփի հետ ՆԱՏՕ-ի գագաթնաժողովի շրջանակներում՝ երկու երկրների միջև հարաբերությունները վերականգնելու համար, այդ մասին գրում է Bloomberg-ը՝ հղում անելով աղբյուրներին։
Երկկողմ հարաբերությունների սրումը տեղի ունեցավ Թուրքիայի կողմից ռուսական S-400 զենիթահրթիռային համակարգեր գնելու որոշումից հետո, որը հանգեցրեց ԱՄՆ պատժամիջոցների և F-35 կործանիչների մատակարարման արգելքի։
Լրատվականի աղբյուրների համաձայն՝ Էրդողանը մտադիր է հասնել սահմանափակումների վերացմանը՝ խոստանալով ռուսական հակահրթիռային պաշտպանության համակարգի «վերահսկվող» օգտագործում: Թուրքիան նախատեսում է գնել 40 F-35 կործանիչ և նույնքան F-16, ինչը, ըստ Անկարայի, կբարելավի փոխգործունակությունը ՆԱՏՕ-ի այլ երկրների հետ և կամրապնդի դաշինքի հարավարևելյան թևի պաշտպանությունը:
Բանակցությունների առանձին թեմա կլինի թուրքական Kaan և Hurjet մարտական ինքնաթիռների համար GE Aerospace F110 և F404 շարժիչների արտադրության լիցենզիա ստանալը։
Ինչպես նշում են Bloomberg-ի աղբյուրները, հանդիպման օրակարգում կարող են լինել նաև ԱՄՆ-ի կողմից աջակցվող սիրիական քրդական կազմավորումները նոր սիրիական զինված ուժերին ինտեգրելու և Սիրիայում Իսրայելի ռազմական ներկայությունը զսպելու հարցերը։ Էրդողանը, ըստ աղբյուրների, մտադիր է մտահոգություն հայտնել Սիրիայի տարածքում մշտական իսրայելական բազայի հնարավոր ստեղծման վերաբերյալ։
