ՀՀ-ում՝ պաշտպանության ժամանակ կամ ծառայողական պարտականությունները կատարելիս զոհված զինծառայողների 5300 ընտանիքներին տրվող դրամական օգնության չափը սեպտեմբերի 1-ից սահմանվել է 30 հզ. դրամ`նախկին 10 հզ. դրամի փոխարեն: Սրան էլ լրացուցիչ ավելանում է 20 հզ. Դրամ՝ յուրաքանչյուր երեխայի համար: Ինչպես այսօր ասուլիսում տեղեկացրեց ՀՀ աշխատանքի և սոցիալական հարցերի փոխնախարար Արտեմ Ասատրյանը, պետական դրամական աջակցությունը միջինը շուրջ 21%-ով աճել է:
«Փոփոխությունների նպատակն է՝ առավել հասցեական, արդյունավետ և նպատակային դարձնել դրամական աջակցությունը»,- ասաց Ա. Ասատրյանը:
Նա ասաց, որ արդեն 1500 ընտանիքներ ներառված են նոր համակարգում, և հույս հայտնեց, որ գործընթացն արագ տեմպերով առաջ կգնա, և հոկտեմբերին լրացված ցուցակներով կվճարվեն նաև մյուս ընտանիքների սեպտեմբերի գումարները:
Փոխնախարարը նշեց, որ նոր կարգով գումարները ստանալու համար անհրաժեշտ է ՀՀ պաշտպանության նախարարությունից կամ այլ լիազոր գերատեսչությունից վերցնել զոհված զինծառայողի ընտանիքի կարգավիճակը փաստող տեղեկանք և դա ներկայացնել սոցապահովության պետական ծառայության տարածքային բաժիններ` դրամական օգնության նոր ցուցակներում ընդգրկվելու համար. «Նախկին 3 մարմինների փոխարեն՝ արդեն մեկ մարմնից կկարողանան ստանալ գումարները»:
Ա. Ասատրյանի խոսքով՝ բացի այդ, խնայողությունների հաշվին 5 հզ. դրամով ավելացել է նաև Հայրենական մեծ պատերազմին և այլ պետություններում մարտական գործողությունների մասնակցելու հետևանքով հաշմանդամ դարձած մոտ 4 հզ. անձանց տրվող դրամական օգնության չափը, ինչպես նաև 5 հզ. դրամով բարձրացել է Հայրենական մեծ պատերազմի շուրջ 2,800 վետերաններին տրվող ամենամսյա պատվովճարի չափը` հասնելով 25 հզ. դրամի:
