Բոստոնում, Չիկագոյում և ԱՄՆ այլ քաղաքներում, ի պաշտպանություն Նյու Յորքում մեկնարկած բողոքի ակցիաների, տեղի են ունեցել հանրահավաքներ, երթեր: Այս նախաձեռնության կազմակերպիչներից է «Քաղաքի իրավունք» ՀԿ-ն: Այս մասին հաղորդում է «Ազատություն» ռադիոկայանը:
Նյու Յորքի ցուցարարների կարգախոսն է` «Բռնազավթենք Ուոլ սթրիթը», որտեղ գտնվում են ԱՄՆ հիմնական ֆինանսական հաստատությունները: Ցույցերն անցնում են օրական մի քանի անգամ, դրանց հիմնականում մասնակցում է երիտասարդությունը: Նրանք բողոքում են բնակարաններ թանկությունից, կապիտալիզմի ներկա դրսևորումներից, ինչպես նաև դատական համակարգից: Այստեղ հնչում են նաև բնապահպանական կարգախոսներ:
Ավելի վաղ ցուցարարները ուղղվել են դեպի Բրուկլինի կամուրջ, ինչի հետևանքով մի քանի ժամ շարունակ ավտոերթևեկությունն ամբողջությամբ կաթվածահար է եղել: Ոստիկանությունը ձերբակալել է 700 մարդու: Փողոցներ և կամուրջներ գրավելու համար ցուցարարների այս խումբն անվանվել է «բռնազավթիչներ»:
