Երեկ Երևան է ժամանել աշխարհահռչակ տենոր Պլասիդո Դոմինգոն, որն այս երեկո հանդես կգա համերգով: Դոմինգոյին ընդունել են Հայաստանի վարչապետն ու Ազգային ժողովի նախագահը` պարգևատրելով ԱԺ Պատվո մեդալով։ Իր հերթին Դոմինգոն հայտնել է, որ հիացած է ջերմ ընդունելությամբ և խոստացել է «այս հիասքանչ երկիրը վայելելու համար» կրկին այցելել Հայաստան:
«Հայաստանն իմ մտքում եղել է դեռ պատանեկան տարիներից: Մայրս երգչուհի էր, նրա վոկալի ուսուցիչը հայ էր, այսպիսով ճանաչում եմ հայերին դեռ վաղ տարիքից, սակայն միշտ չէր ստացվում այցելել»,- ասում է իսպանացի տենորը:
Լեգենդար տենորի համերգը տեղի կունենա Երևանի ամենամեծ` «Կարեն Դեմիրճյան» մարզահամերգային համալիրի մոտ 10.000-տեղանոց դահիճում, չնայած համերգի տոմսերը Հայաստանի համար բավական թանկ էին` 40-200 հազար դրամ (112-560 դոլար), սակայն այժմ տոմսարկղերում տոմսեր գրեթե չկան:
Դոմինգոյին Հայաստան են հրավիրել «Երևանյան հեռանկարներ» փառատոնի կազմակերպիչները, որոնք 2005 թ. ի վեր բանակցություններ էին վարում նրա հետ:
