Ռուսական Regnum լրատվական գործակալության փոխանցմամբ՝ Ադրբեջանի Միլի մեջլիսի (խորհրդարան) աշնանային նստաշրջանի բացման օրը ադրբեջանցի պատգամավորները սուր քննադատություն են հնչեցրել Իրանի հասցեին։
Պատգամավոր Գանիրա Փաշաևան Իրանի խորհրդարանի ուշադրությունն է հրավիրել տեղի ադրբեջանական բնակչության բնապահպանական ու սոցիալական խնդիրների վրա.
«Ադրբեջանը լրջորեն անհանգստացած է Ուրմիա լճի ճակատագրով, քանի որ դրա չորացումը մեծ խնդիրներ է ստեղծում այդտեղ բնակվող մեր հայրենակիցների համար։ Աշխարհում Իրանից բացի, «գոյություն չունի» մեկ այլ երկիր, ուր բնակչության «կեսը»,- տվյալ դեպքում՝ ադրբեջանցիները,- չունենա մայրենի լեզվով կրթություն ստանալու և իր ազգային մշակույթը զարգացնելու իրավունք։
Ես միջազգային հանրության ուշադրությունն եմ հրավիրում Իրանում բնակվող «բազմամիլիոն» ադրբեջանական բնակչության վրա։ Ես կառաջարկեի, որ այն գումարները, որոնք հատկացվում են հակաադրբեջանական քարոզչությամբ զբաղվող «Սեհեր» հեռուստաալիքին, հատկացվեին այդ երկրում բնակվող ադրբեջանցիների սոցիալական դրության բարելավմանը»։
Իսկ պատգամավոր Սիյավուշ Նովրուզովն Իրանում բնակվող «30 միլիոն» ադրբեջանցիներին կոչ է արել ավելի ակտիվ լինել տվյալ հարցում. «Նրանք նվազագույնը կարող են Իրանի Արևմտյան Ադրբեջան նահանգից դեպի Լեռնային Ղարաբաղ մեկնող ավտոմեքենաների առջև փակել ճանապարհը»։
Հիշեցնենք, որ վերջին շրջանում Իրանի ադրբեջանական բնակչությունը բողոքի բազմաթիվ ակցիաներ էր ծավալել՝ պահանջելով չորացումից փրկել Ուրմիա լիճը, որից կախված է միլիոնավոր մարդկանց ճակատագիրը։
Դրա արդյունքում Իրանի կառավարությունը 900 միլիոն դոլար է հատկացրել Ուրմիա լճի չորացման կանխմանն ուղղված միջոցառումների անցկացմանը, որոնց թվում է նաև Արաքս գետի ջրերի օգտագործումը, ինչը, սակայն, կարող է խնդիրներ առաջացնել Ադրբեջանի հետ։