Ադրբեջանական ANS PRESS-ի փոխանցմամբ՝ Ռուսաստանի ԱԳՆ-ի պաշտոնական ներկայացուցիչ Ալեքսանդր Լուկաշևիչն անդրադարձել է ՄԱԿ-ի կողմից Լեռնային Ղարաբաղի վերաբերյալ 4 բանաձևերի իրագործման խնդրին.
«Ղարաբաղյան հակամարտության կարգավորմամբ զբաղվում է ոչ թե ՄԱԿ-ը, այլ՝ ԵԱՀԿ-ն։ Բանակցելը դա մշտապես շատ բարդ գործ է, և այդպիսի ձգձգվող հակամարտության պարագայում չպետք է արագ և հեշտ որոշումների ընդունման ակնկալիքներ տածել։
Սակայն Ռուսաստանը և Միսնկի խմբի մյուս համանախագահող երկրները ձեռնարկում են և ձեռնարկելու են ամեն անհրաժեշտ բան, որպեսզի արագացնեն այն պահը, երբ կողմերը կպայմանավորվեն հակամարտության կարգավորման սկզբունքների շուրջ։
ԵԱՀԿ Մինսկի խմբի մեջ մտնող մյուս երկրների համեմատ՝ Ռուսաստանն ավելի շատ է շահագրգռված, որպեսզի այդ տարածաշրջանում վերականգնվի կայունությունն ու ապահովվի անվտանգությունը։ Նախագահ Դմիտրի Մեդվեդևը ջանքեր է գործադրում Երևանի ու Բաքվի միջև երկխոսությանն աջակցելու համար։
Թե՛ համանախագահները, թե՛ հակամարտող կողմերն ընդունում են բանակցային գործընթացում Ռուսաստանի ակտիվ և արդյունավետ դերակատարությունը։ Բանակցությունների մի շարք փուլերին մասնակցել է անձամբ Ռուսաստանի նախագահը, նրա հովանու ներքո է մշակվել հակամարտության կարգավորման սկզբունքների տեքստը, ինչը կազմում է բանակցային գործընթացի հիմքը։
Իհարկե, ամեն ինչ հեշտ չի ընթանում՝ հաշվի առնելով հակամարտող կողմերի տարբեր մոտեցումները։ Այնուամենայնիվ, Կազանում տեղի ունեցած վերջին հանդիպումը ցույց տվեց, որ հակամարտության կարգավորման հեռանկարները լիովին հասանելի են՝ կողմերի քաղաքական կամք ցուցաբերելու պարագայում»։