ԱԺ փոխխոսնակ Սամվել Նիկոյանն այսօր ԱԺ-ում կազմակերպված՝ բանակում մահացության դեպքերի վերաբերյալ քննարկումը արդյունավետ է համարում: Քննարկումից հետո զրուցելով լրագրողների հետ՝ Նիկոյանը նշեց, որ իրենք լսել են սպանված զինվորների ծնողների դժգոհությունն ու տեսակետները քրեական գործի վերաբերյալ և պայմանավորվել են հետագայում էլ աշխատել արդեն ներկայացված փաստաթղթերի հիման վրա:
«Ես հասկացա, որ Մարդու իրավունքների պաշտպանը և ծնողները ուզում էին շատ ավելի հասարակական հնչեղություն տալ քրեական գործերին և այդ իսկ պատճառով դիմել էին ԱԺ, որպեսզի վերջինս կարողանա կատարել իր վերահսկող ֆունկցիան, ինչը մենք պարտավորված ենք և անպայման կանենք»,- մանրամասնեց Նիկոյանը:
Նա նաև տեղեկացրեց, որ ցանկացած մարմնից, որից ծնողները դժգոհություն կարտահայտեն, ԱԺ-ն այդ բողոքը հղելու տվյալ մարմնի վերահսկող մարմնին:
Նիկոյանը չբացառեց, որ ԱԺ կհրավիրվեն գլխավոր դատախազը, զինվորական դատախազը և բոլոր այն պետական մարմինները, որոնք առնչվում են բանակին վերաբերող քրեական գործերին. «Իհարկե, դա պետք է լինի արդյունավետ` ոչ թե բոլոր ծնողների հետ միաժամանակ, այլ յուրաքանչյուրի հետ առանձին»:
Հարցին՝ հնարավո՞ր է, որ խորհրդարանը այս խնդրի վերաբերյալ հանդես գա հայտարարությամբ, ինչի լիազորությունը ունի, Նիկոյանը պատասխանեց. «Ես գիտեմ՝ ինչպիսի իրավասություններ ունի խորհրդարանը, բայց կարծում եմ, որ նման իրավիճակում խորհրդարանը պետք է ոչ թե ձեռքերը լվա և քաշվի մի կողմ, այլ պետք է իր լիազորությունների շրջանակում փորձի այնպես անել, որ ծնողների մոտ գոհունակություն առաջանա»:
