Կանադացի Ժան Բելիվոն 11 տարի ոտքով ճանապարհորդելուց հետո վերադարձել է հայրենիք: Ճանապարհորդությունը նա սկսել էր 2000 թ., երբ տապալվեց նրա բիզնեսը: Ինչպես հաղորդում է AFP գործակալությունը, այս պահին 56-ամյա Բելիվոն գտնվում է հայրենի քաղաքից մոտ 290 կմ հեռավորության վրա, և նախատեսում է տուն վերադառնալ հոկտեմբերի կեսին:
Ժան Բելիվոն տնից դուրս է եկել 2000 թ. օգոստոսի 18-ին` իր 45-ամյակի օրը: Նա որոշել էր, որ ոտքով կշրջի ամբողջ աշխարհը և այդպիսով կհաղթահարի անհաջող բիզնեսի հետևանքով սկսված դեպրեսիան:
Ճանապարհորդության ընթացքում նա իր հետ վերցրել է փոքր սայլակ՝ անկողնային պարագաներով և 4000 կանդական դոլար: 11 տարվա ընթացքում կանադացին անցել է շուրջ 75 հազար կմ ճանապարհ և եղել 64 երկրներում: Այդ ընթացքում նա ստիպված է եղել քնել փողոցներում, անտունների ապաստարաններում, սակայն եղել են դեպքեր, երբ նրան գիշերելու են հրավիրել տարբեր երկրներում իր նոր ծանոթները:
Կանադացու խոսքերով` իր «զբոսանքի» ընթացքում ինքը լուրջ հիվանդացել է միայն մեկ անգամ Սուդանում, իսկ Եթովպիայում նրան ձերբակալել և մեկ օրով բանտ են նստեցրել: Բացի այդ, արկածային ճամփորդության ընթացում կանադացուն «բախտ է վիճակվել» ճաշակել միջատներից պատրաստված ուտելիք Աֆրիկայում, շան միս` Հարավային Կորեայում, օձ` Չինաստանում:
Այժմ, երբ արդեն գրեթե տուն է հասել, Բելիվոն երազում է միանալ իր ընկերուհու և երեխաների հետ: Հանգստանալուց հետո նա պատրաստվում է գիրք գրել իր արկածների մասին, ինչպես նաև դասախոսություններ կարդալ ճանապարհորդությունների մասին:
