Եմենի նախագահ Ալի Աբդալլահ Սալեհը այսօր հայտարարել է, որ չի պատրաստվում պաշտոնը թողնել իր նախկին կողմնակիցներին, որոնք անցել են ապստամբների կողմը, քանի որ դա կարող է հանգեցնել քաղաքացիական պատերազմի: Այս մասին հաղորդում է Al-Arabiya-ն:
«Եթե մենք համաձայնենք իշխանությունը փոխանցել ապստամբներին, ապա դա կնշանակի հանձնվել խռովարարներին: Եթե այդ մարդիկ մնան իշխանության ղեկի մոտ, կստեղծվի շատ վտանգավոր իրավիճակ: Դա կարող է հանգեցնել քաղաքացիական պատերազմի»,- ասել է Սալեհը: Ընդ որում, նա հղում է կատարել Պարսից ծոցի արաբական երկրների համագործակցության խորհրդի նախաձեռնությանը, համաձայն որի՝ իր հրաժարականը տեղի կունենա միայն այն դեպքում, երբ վերացվեն դրան խոչընդոտող բոլոր խնդիրները:
Նա թյուրըմբռնում է համարել այդ ծրագրի ստորագրման շուրջ ստեղծված իրավիճակը` նշելով, որ ինքը կզիջի նույնիսկ առաջիկա ժամերի ընթացքոււմ, եթե ընդդիմությունը գնա զիջումների: Հիշեցնենք, որ Պարսից ծոցի արաբական երկրների կողմից առաջարկված ծրագրով Սալեհը պետք է հրաժարական տար, որից հետո 30 օրվա ընթացքում կնշանակվեին ընտրություններ: Սալեհն արդեն բազմիցս հայտարարել է, թե հեռանում է, սակայն հետո հրաժարվել է:
