Երեկ Մոլդովայի խորհրդարանում տեղի ունեցած քննարկումների ժամանակ Մոլդովայի պաշտպանության նախարար Վիտալիե Մարինուցան հաստատել է Հայաստանին զենք վաճառելու փաստը` հավելելով, որ այդ գործողությունների մեջ ոչ մի անօրինականություն չկա և համապատասխանում է միջազգային բոլոր նորմերին: Սակայն պատգամավորների հետ հարցուպատասխանի ժամանակ պարզվել է, որ դա այդքան էլ չի համապատասխանում իրականությանը: Այս մասին հաղորդում է Новости-Молдова լրատվական գործակալությունը:
Մարինուցան ասել է, որ ոչ մի միջազգային դիտորդ չի մասնակցել զենքի փոխանցմանը, ինչը սահմանված է միջազգային օրենքներով: Պաշտպանության նախարաը հրաժարվել է ասել, թե ով է եղել գնորդը` նշելով, որ դա եղել է փակ տիպի տենդեր: Մարինիցուն նաև ասել է, որ այդ զենքը հնարավոր չէ օգտագործել, քանի որ ժամկետանց է, սակայն չի պատասխանել հարցին՝ արդյո՞ք այդ զենքը վերանորոգելուց հետո հնարավոր կլինի օգտագործել:
Հիշեցնենք, որ Հայաստանին զենք վաճառելու հետ կապված սկանդալը շարունակվում է Մոլդովայի քաղաքական շրջանակներում: Այս փաստի բացահայտումից հետո հրաժարական է տվել երկրի Զինված ուժերի գլխավոր շտաբի պետը: Բացի այդ, Ադրբեջանը փորձում է օգտվել այս առիթից և հարցը բարձրացնել տարբեր ատյաններում` Հայաստանը ներկայացնելով որպես պատերազմի նախապատրաստվող երկիր: