Թուրքական Zaman թերթի փոխանցմամբ՝ Ֆրանսիայում գտնվող Թուրքիայի դեսպանատունը նոտա է հղել այդ երկրի արտգործնախարարություն։ Դրա համար պատճառ է հանդիսացել այն, որ Քրդստանի աշխատավորական կուսակցության (PKK) զինյալները հարձակում են գործել Փարիզում գտնվող Թուրքիայի մշակութային ու զբոսաշրջային հյուպատոսության վրա։
Ֆրանսիայում Թուրքիայի դեսպան Թահսին Բուրջուօղլուն Ֆրանսիայի ներքին գործերի նախարար Կլոդ Գեանի հետ հանդիպման ժամանակ հայտարարել է, որ իր երկիրը մտահոգ է Ֆրանսիայի տարածքում PKK-ի գործողություններից ու գործունեությունից։ Թուրք դեսպանը նաև ցանկություն է հայտնել, որ ֆրանսիական կողմը ուժեղացնի թուրքական պետական և հասարակական կազմակերպությունների անվտանգության միջոցները։
Ակնկալվում է, որ հոկտեմբերի 6-ին Գեանն այցելելու է Թուրքիա, ուր և կողմերը կնքելու են ահաբեկչության դեմ պայքարում երկու երկրների համագործակցության մասին համաձայնագիր։
Հիշեցնենք, որ այս տարվա օգոստոսի վերջին էլ Փարզիում Թուրքիայի դեսպանատունը բողոքի նոտա էր հղել Ֆրանսիայի ներքին ու արտաքին գործերի նախարարություններին, քանի որ դրանից մեկ շաբաթ առաջ PKK-ի համակիրները բողոքի ակցիա էին կազմակերպել Փարիզի կառավարչական շենքերի առջև՝ բողոքելով Թուրքիայի ռազմաօդային ուժերի կողմից Հյուսիսային Իրաքի ռմբակոծությունների դեմ։
Ի դեպ, ներկայումս Ֆրանսիայում ընթանում է նաև 18 PKK-ականների դատավարությունը, որոնց դատավճիռը հրապարակվելու է նոյեմբերի 2-ին։