Լիտվայում տեղակայված ամերիկյան ռազմական զորակազմին պատկանող M88 Hercules զրահամեքենայի անձնակազմի չորրորդ անդամի որոնողական աշխատանքները դեռ արդյունք չեն տվել։ Այս մասին LRT ազգային ռադիոյի եթերում հայտարարել է Լիտվայի Հանրապետության պաշտպանության նախարար Դովիլե Շակալիենեն։
«Չորրորդ ամերիկացի զինծառայողին հայտնաբերելու գործընթացը շարունակվել է ողջ գիշեր, նրան գտնել չի հաջողվել, որոնողական աշխատանքները շարունակվում են», – նշել է նախարարը։
Մարտի 31-ին Եվրոպայում և Աֆրիկայում ԱՄՆ ուժերի միացյալ հրամանատարությունը հաստատել է անձնակազմի չորս անդամներից երեքի մահը:
Իրավիճակի առնչությամբ ԱՄՆ նախագահ Դոնալդ Թրամփը լրագրողների հետ զրույցում նշել է, որ իրեն տեղեկացրել են Պաբրադում հայտնաբերված երեք ամերիկացի զինվորների ճակատագրի մասին։
«Դա շատ ծանր մեքենա էր․․․ Թվում է, թե լճի ափը փլուզվել է մեծ ծանրության տակ: Գիշեր էր, շատ ցուրտ եղանակ, սառույց, այնպես որ, հավանաբար, զրահամեքենան սահել է․․․․ Դա հսկայական քաշով մեքենա է», – ասել է Թրամփը:
ԱՄՆ պետքարտուղար Մարկո Ռուբիոն իր ցավակցությունն է հայտնել զոհվածների ընտանիքներին և շնորհակալություն հայտնել Լիտվային օգնության համար։
Մարտի 25-ի երեկոյան Պաբրադում Լիտվայի բանակի կենտրոնական զորավարժության գոտում վարժանքներից հետո չորս ամերիկացի զինծառայողներ M88 Hercules զրահամեքենայով դուրս են եկել և անհետացել։ Մարտի 26-ին մեքենան հայտնաբերվել է ամբողջությամբ ընկղմված ճահճի մեջ։ Մարտի 31-ի գիշերը մեքենան քարշակով հանել են ցամաք։
