Նոր ուսումնասիրությունը ցույց է տվել Եվրոպայում կյանքի տևողության աճի դանդաղումը։ Ամենավատ իրավիճակն այս առումով Միացյալ Թագավորությունում է։
Գիտնականների կարծիքով՝ մեղավորն անառողջ սննդակարգն է։ Եվրոպայում կյանքի տևողության աճը գործնականում կանգ է առել ավելորդ քաշի, ալկոհոլիզմի և պասիվ կյանքի պատճառով: Նման եզրակացության են եկել բրիտանացի գիտնականները, որոնք իրենց եզրակացությունները հրապարակել են Lancet ամսագրի փետրվարյան համարում։
Եվրոպայում կյանքի տևողության՝ տասնամյակներ տևած բարելավումը կանգ է առել 2011թ. հետո։ Հետազոտությունն իրականացվել է 20 երկրում։
Նորվեգիան, որտեղ պետական մակարդակով իրականացվում է շաքարից հրաժարվելու քաղաքականություն, մնացել է միակ երկիրը, որտեղ կյանքի տևողությունը շարունակել է աճել ընդհուպ մինչև համաճարակ:
2011թ. հետո նկատվող միտումը կապված է սիրտ-անոթային հիվանդություններից մահացության աճի հետ, որն առաջացել է անառողջ կենսակերպի հետևանքով՝ ռաֆինացված սննդի օգտագործում, ֆիզիկական ծանրաբեռնվածության բացակայություն, ճարպակալում:
Համաճարակը շրջադարձային կետ է եղել այն երկրների համար, որտեղ իրականացվել է հետազոտությունը: Նշվում է, որ այն պետությունները, որոնք մյուսներից երկար են պահպանել կյանքի տևողության աճը մինչև 2020թ., մյուսներից ավելի լավ են տարել կորոնավիրուսը։ Դրանք են սկանդինավյան երկրները, Իսլանդիան և Բելգիան։ Հունաստանն ու Բրիտանիան, ընդհակառակն, ցույց են տվել ամենալուրջ անկումը․ այնտեղ կյանքի տևողությունը կրճատվել է մոտ 7 ամսով։
