Փարիզում շարունակվում է արհեստական բանականությանը (ԱԲ) նվիրված գագաթնաժողովը: Օրակարգում են արհեստական բանականության կառավարման առանձնահատկությունները և ԱԲ հանրահռչակումը: Գագաթնաժողովը համանախագահում են Ֆրանսիայի նախագահը և Հնդկաստանի վարչապետը:
Նարենդրա Մոդին հայտարարել է, որ AI-ի (անգլ.՝ Arttificial Intelligence, արհեստական բանականություն – խմբ.) զարգացման հետ կապված հիմնական մտավախությունը աշխատատեղերի հնարավոր կրճատումն է: Այդ համատեքստում Հնդկաստանի կառավարության ղեկավարը կոչ է արել արհեստական բանականության միջազգային կառավարման համակարգ ստեղծել՝ դրա արագ զարգացման ռիսկերը կառավարելու համար։
Երեկ՝ գագաթնաժողովին ընդառաջ, Էմանուել Մակրոնը հայտարարել էր, որ առաջիկա տարիներին երկրում արհեստական բանականության ոլորտում կներդրվի 109 միլիարդ եվրո։ Նրա խոսքով՝ այդ գումարը կտրամադրեն Արաբական Միացյալ Էմիրությունները, ամերիկյան և կանադական խոշոր ներդրումային հիմնադրամները և ֆրանսիական ընկերությունները։
