2012 թվականին Լոնդոնի Պարալիմպիկ խաղերին ընդառաջ՝ Երևանում բրիտանական դեսպանատունը, Բրիտանական խորհրդի հայաստանյան գրասենյակը, Հայաստանի ազգային պարալիմպիկ կոմիտեն՝ Samsung Electronics-ի հայաստանյան ներկայացուցչության աջակցությամբ, այսօր «Գրանտ սպորտ» համալիրում կազմակերպեցին մարզաձևերի ցուցադրություն և լուսանկարների ցուցահանդես:
Ցուցահանդեսի այցելուները քվեարկության արդյունքում կընտրեն երեք լավագույն լուսանկարներ, որոնցում պատկերված մարզիկները կստանան նվերներ՝ օլիմպիական խաղերի պաշտոնական հովանավոր Samsung ընկերության կողմից: Միջոցառմանը ներկա էր նաև Հայաստանում Մեծ Բրիտանիայի դեսպան Չարլզ Լոնդստեյը, Բրիտանական խորհրդի Արևելյան Եվրոպայի տարածաշրջանի տնօրեն Մայքլ Բըրդը և Հայաստանի ազգային պարալիմպիկ կոմիտեի նախագահ Հակոբ Աբրահամյանը:
Մեծ Բրիտանիայի դեսպանը իր խոսքում նշեց, որ պարալիմպիկ շարժումը սկիզբ է առել 1948 թվականին՝ Լոնդոնի օլիմպիական խաղերին զուգընթաց: Չարլզ Լոնդստեյն իր հերթին ասաց, որ այս միջոցառումը նպատակ ունի ոչ միայն ներկայացնելու պարալիմպիկ մարզիկներին, այլև կոչ անելու հովանավորներին՝ ավելի մեծ ուշադրություն դարձնել հաշմանդամ մարզիկներին:
Միջոցառմանը ներկա էին բազմաթիվ հայ մարզիկներ, ովքեր խոստացան, որ ամեն ինչ կանեն Լոնդոնում կայանալիք Պարալիմպիկ խաղերից մեդալներով վերադառնալու համար:
