Այսօր բանավեճի էին հրավիրված ՀՀԿ-ական ԱԺ պատգամավոր Հովհաննես Սահակյանը և Քաղաքագետների միության նախագահ Հմայակ Հովհաննիսյանը:
Պատասխանելով այն հարցին, թե Պուտինի առաջադրումը նախագահի պաշտոնում ի՞նչ ազդեցություն կունենա մեր քաղաքական դաշտի վրա, Հովհաննես Սահակյանն ասաց, որ ՀՀ-ում ժողովուրդն է իր ընտրությունը կատարում, և նա էլ կորոշի: «Ես այսօր էլ հավատարիմ կմնամ իմ որդեգրած գաղափարին և կհիշեցնեմ Քոչարյանի այն հայտարարությունը, որ երբ որոշի վերադառնալ քաղաքականություն այդ մասին անձամբ կհայտարարի: Հետևաբար այս դեպքում կանխատեսումն անշնորհակալ գործ կլինի»,- ավելացրեց Սահակյանը: Նա նաև ասաց, որ հակված չէ մտածել, թե նախագահների փոփոխությամբ մեր համգործակցությունը Ռուսաստանի հետ ևս կփոխվի:
Հմայակ Հովհաննիսյանը իր հերթին նշեց, որ եթե ՀԱԿ-ը իր քաղաքական հեռանկարը կապի այն տեսակետի հետ, որ ինքը կարող է պահնջված լինել Սերժ Սարգսյանի համար, որպես գործոն, որը կչեզոքացնի Քոչարյանի ազդեցությունը, կհայտնվի այն նույն իրավիճակում, ինչ Ռուսաստանի լիդերները, ովքեր հույս ունեին, որ Պուտին-Մեդվեդև հակամարտություն կառաջանա:
Հովհաննես Սահակյանն, արձագանքելով այն հարցին, թե ՀՀԿ-ն կփարատի՞ ՀԱԿ-ի հույսերը, ասաց. «Քանի որ բոլորի հույսը «Հանրապետականն» է, ստիպված ենք փարատել: Մենք մեր քաղաքական ուղին ունենք, և եթե ՀԱԿ-ը որոշի միանալ, մենք պատրաստ ենք համագործակցել: Մենք այն քաղաքական ուժն ենք, որ պատրաստ ենք երկխոսել և համգործակցել»:
Ղարաբաղյան խնդրի հարցում, ըստ Հմայակ Հովհաննիսյանի, երկու գիծ կա, մեկը Լևոն Տեր-Պետրոսյանինն է, մյուսը՝ Ռոբերտ Քոչարյանինը: Ըստ նրա՝ երրորդ գիծ չկա, քանի որ Սերժ Սարգսյանը հստակ չի արտահայտվել, իսկ հստակ կարտահայտվի, եթե նրա առաջ «կամ-կամ»-ի հարց դնեն: Հովհաննես Սահակյանը չհամաձայնեց՝ նշելով, որ Սերժ Սարգսյանը բազմիցս է խոսել իր քաղաքական գծի մասին:
Վերջում Հովհաննես Սահակյանն ավելացրեց, որ «Քոչարյանը, եթե վերադառնա, շատ ավելի լավ, եթե ոչ՝ ի՞նչ արած»։
