Ցանկալի կլինի գինեգործությունը զարգացնել էլ ավելի մեծ չափերով, որպեսզի կարողանանք արտահանել: Նախ՝ այն պետք է քանակապես բավարարի մեր պահանջներին, այնուհետև` որակապես: Իհարկե, արտահանվող գինիների որակը ավելի բարձր է, քան ներքին շուկայում: Այս մասին 1in.am «Առաջին լրատվական»-ի հետ զրույցում ասաց տեխնիկական գիտությունների դոկտոր Սիլվա Սահրադյանը:
Խաղողի հումքի որակը ևս վատացել է: Օրինակ՝ «խարջի» տեսակի խաղողը մեզ մոտ հիմա չեն աճեցնում, քանի որ շուտ փչացող է, սակայն հենց այս տեսակն է, որ գինու համար ամենալավ հումքն է: Այժմ հաճախ գինու արտադրության համար օգտագործվում են խաղողի ոչ պիտանի սորտեր:
Այն հարցին, թե այսօր ՀՀ-ում գինեգործությունը ինչ լուրջ խնդիր ունի, որ պետք է լուծվի, տիկին Սահրադյանը պատասխանեց. «Առաջին հերթին դա տեխնոլոգիական գործընթացների ճիշտ իրականացումն է և հումքի որակը: Եթե մենք արտադրում ենք փրփրող գինի, ապա անհրաժեշտ է, որ խաղողի շաքարայնությունը 19%-ից ցածր չլինի: Հաջորդ խնդիրը պահպանման ժամկետների երկարացումն է: Եթե գինու պահպանման ժամկետը երկարացվել է, նշանակում է՝ օգտագործվել են հավելյալ կոնսերվանտներ, ինչը ևս բացասաբար է ազդում գինու որակի վրա»:
Անդրադառնալով սպիրտի ներկրմանը, որը օգտագործվում է ՀՀ-ում խմիչք արտադրելու մեջ` Սիլվա Սահրադյանը նշեց, որ եթե ներկրված սպիրտ է օգտագործվում խմիչքի արտադրության մեջ, ապա պետք է պարտադիր նշվի, թե ինքնարժեքի մեջ որ տոկոսն է կազմում այն: Քանի որ ծագման երկրի փորձաքննության ժամանակ անպայման հաշվի են առնվում ներկրված հումքի քանակը և կազմած գումարը ինքնարժեքի մեջ, և եթե դա կազմում է մոտ 50% կամ պակաս, ապա կարող ենք տվյալ արտադրանքին տալ երկրի ծագման ծածկագիր, և այն կարող է արտահանվել որպես ՀՀ արտադրանք:
