Այսօր Երևանում սկսվել է Հայաստանում մրցակցային խնդիրների շուրջ սեմինար-քննարկում, որին մասնակցում են Վարչական ու Վերաքննիչ-վարչական դատարանների դատավորները, ԵՄ փորձագետներ և Տնտեսական մրցակցության պաշտպանության պետական հանձնաժողովի ներկայացուցիչներ:
ՏՄՊՊՀ նախագահ Արտակ Շաբոյանը նշեց, որ մրցակցության տեսանկյունից մեծ նշանակություն ունի դատական համակարգը, քանի որ տնտեսվարողների կողմից հանձնաժողովի որոշումների մեծ մասը բողոքարկվում է: «Կարևոր է, որ մրցակցության ոլորտի խնդիրները քննելիս` դատավորները լինեն ավելի քաջատեղյակ ոլորտից»,-ասաց Շաբոյանը` նաև կարևորելով դատական համակարգի և մրցակցության ոլորտի ներկայացուցիչների փոխհարաբերությունները:
ԵՄ պատվիրակության ներկայացուցիչ Օնո Սիմոնսը նշեց, որ Եվրամիությունը կարևորում է Հայաստանում մրցակցության բարձրացումը: Նրա կարծիքով` պետք է լինեն պատշաճ օրենքներ` մրցակցությունը պաշտպանելու համար: ԵՄ անդամ պետությունների փորձագետներ Կուրտ Շթոքմանը և Յուրատե Սոլիենը ներկայացրեցին հակամրցակցային համաձայնությունների արգելուման, գերիշխող դիրքի չարաշահումների և համակենտրոնացումների իրավական կարգավորման մասին զեկույցներ, որից հետո փորձագետները կոնկրետ իրավական օրինակներով անդրադարձան եվրոպական դատարանների կողմից կայացված մի քանի վճիռների: