Ադրբեջանի նախագահի օգնական Հիքմեթ Հաջիևը հայտարարել է, որ Հայաստանի ու Ադրբեջանի խաղաղության պայմանագրի բանակցության գործընթացը նոր փուլ կմտնի դեկտեմբերին: Հաջիևը հայտարարել է, թե այժմ Բաքուն ամբողջությամբ զբաղված է COP29-ով: «Անշուշտ, դեկտեմբերից սկսած, նոր գործընթաց կսկսվի Հայաստանի և Ադրբեջանի միջև՝ խաղաղության պայմանագրի տեքստի շուրջ բանակցությունները քննարկելու և շարունակելու վերաբերյալ»,- հայտարարել է Հաջիևը:
Նա օգտագործում է բավականին ուշագրավ ձևակերպումներ՝ նոր փուլի, նոր գործընթաց սկսելու մասին: Դա թույլ է տալիս եզրակացնել, որ խոսքը ոչ թե պարզապես մինչ այդ եղած գործընթացը շարունակելու մասին է, այլ նաև նոր հանգամանքների կամ տարրերի: Դրանք կունենան ձևաչափային, թե՞ բովանդակային դրսևորում, ասելը դժվար է, սակայն այդպիսի հավանականության մասին գրել էին ընդամենը օրեր առաջ այն բանից հետո, երբ Ադրբեջանը կազմակերպել էր խաղաղության պայմանագրի այսպես ասած չհամաձայնեցված կետերի արտահոսք:
Այդ արտահոսքի առիթով մատնանշել էի, որ այդօրինակ արտահոսքերը կարող են նշանակել, որ կոնֆիդենցիալ բանակցության ենթակա բովանդակության հանրայնացումը կամ ունի դիմացինի հանդեպ ներքին հանրային ճնշում խթանելու նպատակ, կամ նշանակում է, որ հանրայնացված բովանդակությունn այլևս արդիական չէ և բանակցային գործընթաց է «մուտք գործում» որոշակի նոր տրամաբանություն:
Փաստացի, ընդամենը օրեր անց Բաքուն հայտարարում է, որ նոր փուլ, նոր գործընթաց կսկսի և Հայաստանը խաղաղության պայմանագրի շուրջ աշխատանքը կշարունակեն արդեն դեկտեմբերին: Իսկ արդյո՞ք այդ մասին են խոսել նաև ԱՄՆ պետքարտուղար Էնթոնի Բլինքենն ու Թուրքիայի արտգործնախարար Ֆիդանը, որոնք նախօրեին հեռախոսազրույց են ունեցել և քննարկել են տարբեր միջազգային հարցեր, այդ թվում`Երևանի և Բաքվի միջև գործընթացը, ինչպես հայտնել է թուրքական կողմը:
Իհարկե բարդ է ասել, թե որքան առաջնային է եղել այդ գործընթացը նրանց խոսակցությունում` հաշվի առնելով այն, որ Էնթոնի Բլինքենն արդեն փաստորեն ԱՄՆ հեռացող ադմինիստրացիայի պետքարտուղարն է, որի գործունեության համար դեկտեմբերն ըստ էության վերջին ամիսն է: Մինչդեռ, դատելով Հաջիևի հայտարարությունից, դեկտեմբերին մեկնարկելիք գործընթացը ենթադրելու է ոչ թե «եզրափակիչ», և նույնիսկ ոչ էլ «կիսաեզրափակիչ», այլ գուցե անգամ նոր «ռեգուլյար» տրամաբանությունից, այսինքն՝ որոշակի մեկնարկ:
Ըստ այդմ՝ դա կարող է զուգորդվել ԱՄՆ նոր վարչակազմի աշխատանքի մեկնարկի հետ: Ավելին՝ թերևս հենց դրանով է պայմանավորված նաև այն, որ հայ-ադրբեջանական գործընթացում խոսվում է «նոր փուլի» մասին: Արդյո՞ք դա է նաև պատճառը, որ Երևանն ու Բաքուն չհամաձայնեցրին COP29-ին Հայաստանի մասնակցության հարց, քանի որ դա արդեն դիտվեց այսպես ասած «անցնող փուլի» օրակարգ:
