ՌԴ նախագահի մամուլի քարտուղար Պեսկովն անոնսավորել է, որ Կրեմլում նախագահ Պուտինը կընդունի նորանշանակ դեսպանների հավատարմագրերը և, ինչպես ավանդույթն է սահմանում, հանդես կգա արտաքին քաղաքականության մասին ելույթով:
Նախօրերին Ռուսաստանի նախագահը հարցազրույց է տվել «60 րոպե» հեռուստահաղորդմանը: Դժվար չէ հասկանալ, որ թե՛ հարցազրույցը, թե՛ երկու տասնյակից ավելի դեսպանների հավատարմագրերի հանդիպումը կազմակերպվել են ԱՄՆ նախագահական ընտրություններին ընդառաջ և քվեարկության օրը:
Կարելի է համարել, որ Վլադիմիր Պուտինը ուղերձ է հղում Միացյալ Նահանգներին և արևմտյան աշխարհին: Ըստ էության՝ դա նույնն է, ինչ նա ասել է հունիսի 14-ին՝ Մոսկվան պատրաստ է Կիևի հետ բանակցությունների, բայց դրանք առաջին հերթին պետք է երաշխավորեն Ռուսաստանի շահերը:
«Ես ասում եմ պարզ, առանց ամաչելու. ելքը պետք է լինի հօգուտ Ռուսաստանի, այն հիմքի վրա, որ ձևավորվել են մարտի դաշտում»,– հեռուստահարցազրույցի ժամանակ ասել է Վլադիմիր Պուտինը:
Պուտինը հիշեցրել է, որ Թուրքիայի արտաքին գործերի նախարարը Նյու Յորքից կապվել է իր օգնական Ուշակովի հետ և Ուկրաինայի անունից առաջարկություն արել, բայց հաջորդ օրը Վլադիմիր Զելենսկին հայտարարել է, որ Մոսկվայի հետ ոչ մի բանակցություն չի կարող լինել:
Նա խոսել է նաև Կազանում Թուրքիայի նախագահի հետ բանակցությունների մասին: Ըստ Պուտինի՝ Էրդողանն առաջարկել է վերսկսել հացահատիկի արտահանման և Սև ծովի ականազերծման հարցով բանակցություններ: «Ռուսաստանը դեմ չէ, երբեք չի հրաժարվել բանակցություններից, բայց ստեղծված իրավիճակում առաջնայինը մեր ազգային շահերն են»,– ասել է Պուտինը:
Պուտինը նաև Ուկրաինայի ներքաղաքական իրավիճակն է գնահատել: Նրա կարծիքով՝ Զելենսկին բանակցությունների չի գնում, հրադադար չի հաստատում, քանի որ այդ դեպքում հարկ կլինի վերացնել ռազմական դրությունը և գնալ նոր ընտրությունների:
Ամենայն հավանականությամբ՝ Ռուսաստանի նախագահը նույն թեզիսները շարադրելու է նաև դեսպանների հավատարմագրերն ընդունելու արարողության ելույթում: Նրա մամուլի քարտուղարը, ի դեպ, նաև անոնսավորել է, որ երեկոյան Կրեմլում Պուտինը մի քանի ոչ հրապարակային հանդիպումներ կունենա:
Խոսքը, հավանաբար, առանձին երկրների դեսպանների հետ քննարկումների մասին է: Ըստ տեղեկությունների՝ ՌԴ նախագահին հավատարմագիր կհանձնի նաև Հայաստանի դեսպան Գուրգեն Արսենյանը: ՌԴ նախագահը նրա հետ առանձնազրույց կունենա՞:
