Թումո ստեղծարար տեխնոլոգիաների կենտրոնում սովորել ցանկացողների գրանցումը շարունակվում է: Կենտրոնի մամլո պատասխանատու Սեդա Պապոյանն «Առաջին լրատվականին» հայտնեց, որ ներկայում գրանցումն իրականացվում է ժամը 15:00-19:00-ը՝ ժամակտրոնով: Ընդ որում՝ մինչև նոյեմբերի 8-ն արդեն ժամակտրոն է տրվել:
«Ակտիվությունը շատ է, թեև առաջին օրերի համեմատ մի քիչ պակասել է, սակայն օրը մինչև 50 մարդ գրանցվում է ասաց Ս.Պապոյանը:
Կենտրոնում արդեն օրական 3 անգամ դասեր են ընթանում, որոնց սեպտեմբերի ընթացքում միաժամանակ հաճախում են 75 երեխաներ, հոկտեմբերից նրանց թիվը կավելանա և կկազմի 150, իսկ նոյեմբերից՝ 300 և ավելի:
Թումոյի բացման օրվանից մինչ այսօր կենտրոն են ընդունվել ավելի քան 4300 պատանիներ, որոնցից շուրջ 60%-ը տղաներ են, 40%-ը՝ աղջիկներ:
Ի դեպ, հասարակության շրջանում քննարկումների առարկա էր դարձել այն, որ Թումոյում երեխաների ստեղծած ծրագրերն ու նյութերը պատկանելու են կենտրոնին: Եվ իսկապես՝ Թումոյի կայքում տեղադրված է կենտրոն ընդունվողի և նրա ծնողի հետ կնքվող պայմանագիրը, որում նշվում է.
«Անդամի կողմից Կենտրոնում ստեղծված մտավոր սեփականությունը պատկանում է Կենտրոնին», նաև որ Կենտրոնն իրավունք ունի իր հայեցողությամբ անժամկետ օգտագործել ստեղծված բոլոր ծրագրերն ու աշխատանքները, տիրապետել կամ տնօրինել դրանք` որպես Կենտրոնի սեփականություն, իսկ երիտասարդը իր կողմից կամ մյուս անդամների հետ համատեղ ստեղծված ծրագրերն ու աշխատանքները կոմերցիոն կամ ոչ կոմերցիոն նպատակներով օգտագործել կարող է կենտրոնի գրավոր թույլտվությամբ, դրանք երրորդ անձանց ներկայացնելու դեպքում պետք է նշի Թումոյում ստեղծվելու հանգամանքը:
