Грузия Online-ը, վկայակոչելով Հայաստանի ԱԳՆ-ն, հայտնում է, որ Հայաստանում Վրաստանի դեսպան Թենգիզ Շարմանաշվիլին կանչվել է Հայաստանի ԱԳՆ՝ պարզաբանումներ տալու սեպտեմբերի 18-ին Լեռնային Ղարաբաղում անցկացված տեղական ինքնակառավարման մարմինների ընտրությանն առնչվող Վրաստանի ԱԳՆ-ի հայտարարության շուրջ։
Նշվում է, որ Լեռնային Ղարաբաղում տեղի ունեցած ընտրություններից հետո Վրաստանի ԱԳՆ-ն հայտարարել էր, թե չի ճանաչում ԼՂՀ-ում անցկացված «ապօրինի» ընտրությունները.
«Վրաստանի արտաքին գործերի նախարարությունը հաստատում է միջազգայնորեն ճանաչված սահմաններում Ադրբեջանի տարածքային ամբողջականության ու ինքնիշխանության հանդեպ իր միանշանակ աջակցությունը և չի ճանաչում 2011 թվականի սեպտեմբերի 18-ին ԼՂՀ-ում անցկացված «ապօրինի, այսպես կոչված՝ տեղական ինքնակառավարման մարմինների ընտրությունների» անցկացումը։
Վրաստանի ԱԳՆ-ն ողջունում է ղարաբաղյան հակամարտության խաղաղ կարգավորմանն ուղղված միջազգային հանրության ջանքերը և կարծում է, որ շարունակվող երկխոսության այլընտրանքներ գոյություն չունեն»։
Այս խնդրին անդրադարձել է նաև ռուսական Regnum լրատվական գործակալությունը, ում հետաքրքրում է, թե արդյո՞ք նույնպիսի ճակատագրի կարժանանա նաև Հայաստանում Ռուսաստանի դեսպանը, քանի որ Լեռնային Ղարաբաղում անցկացված ընտրությունների վերաբերյալ նմանատիպ հայտարարությամբ հանդես է եկել նաև Ռուսաստանի ԱԳՆ-ն։
