Վերջին ամիսների ընթացքում ԵԿՄ վարչության նախագահ, գեներալ Մանվել Գրիգորյանի ընտանիքի շուրջ խոսակցությունները և նրանց առաջիկա անելիքների շուրջ կանխատեսումները մամուլի էջերից չեն իջնում: Օրինակ` նշվում է, որ անկախության 20-ամյակի առթիվ անցկացվող զինվորական շքերթի համար Մանվել Գրիգորյանը 20 տանկ է նվիրել, որպեսզի որդին և կինը` Նազիկը, ընտրվեն ԱԺ պատգամավոր: Վայոց ձորի մարզի Վայք քաղաքի ջերմուկի գործարանի 2-րդ մասնաշենքն է գնել և այլն, և այլն: Պարզելու համար` արդյո՞ք այս խոսակցությունները համապատասխանում են իրականությանը, թե՞ ոչ, զրուցեցինք անձամբ Մանվել Գրիգորյանի որդու` Էջմիածնի քաղաքապետ Կարեն Գրիգորյանի հետ:
Կարեն Գրիգորյանը մեզ հետ զրույցում, անդրադառնալով տարածված ասեկոսեների պատճառահետևանքային կապերին, ասաց. «Ինձանից լավ գիտեք, որ այդ լուրերի պատճառը թերթի վաճառքի խնդիրն է: Մեր ընտանիքի թեման դարձրել են թերթի վաճառքի խթանման միջոց: Իսկ մենք սովորական մարդու պես ապրում և արարում եք: Մենք մեր գործն ենք անում, ոչ ուզում ենք ինչ-որ մեկի հացը կտրել, ոչ էլ չգիտեմ եսիմ ինչ անել: Լավ կանեք գրողից հարցնեք, թե իրեն այդ ինֆորմացիան որտեղից: Առավոտից երեկո նայում եմ, թե մեր ընտանիքի շուրջ ինչքան թեմաներ են գրում: Բայց այդքանից և ոչ մեկը իրականությանը չի համապատասխանում: Հետևաբար, չեմ էլ ցանկանում անդրադառնալ այդ ամենին: Փորձում եմ անուշադրության տալ, քանի որ այդ ամենը իրականությանը մոտ չէ: Հետևաբար` ես չեմ ցանկանա ո՛չ տանկերի պատմությանը անդրադառնալ, ո՛չ իմ և Նազիկի կողմից ԱԺ պատգամավոր դառնալու մտադրությանը, ո՛չ էլ Վայոց ձորի Վայք քաղաքի ջերմուկի գործարանի 2-րդ մասնաշենքի գնմանը, քանի որ այդ ամենում իմաստ չեմ տեսնում»: Մեր այն դիտարկմանը, թե այստեղ ինքը միայն թերթերի վաճառքի՞ խնդիր է տեսնում, թե՞ քաղաքական պատվեր` պատասխանեց. «Ես չգիտեմ, թե որ թերթի հետևում ով է կանգնած, որ տեսնեմ` ինչ-որ պատվեր կա, թե` ոչ: Ես ուղղակի փորձում եմ իմ գործն անել և որքան հնարավոր է` լավ»:
Ավելի ուշ մեզ հետ կապ հաստատեց Էջմիածնի քաղաքապետարանի լրատվության վարչության պետ Վարդան Վարդանյանը` հետևյալ հարցադրմամբ. «Կարեն Գրիգորյանի նման քաղաքապետը, որ այդ մասշտաբի աշխատանքներ է իրականացնում, կթողնի կգնա՞ ինչ-որ տեղ, կարծում եք: Որ խնդրեն էլ` չի գնա ախր: Ինքն անընդհատ քաղաքապետի պաշտոնում է առաջադրվելու, որովհետև շատ լավ է աշխատում ժողովրդի հետ: Իսկ տանկերի մասով ասեմ, որ վատ բան չէր լինի, որ նվիրված լիներ:
Վատ է, որ նշում են, թե ինչ-որ բանի դիմաց: Նախ` սկսենք այնտեղից` կարո՞ղ է ինչ-որ անհատ տանկ գնել, թե` ոչ: Ավելին` իրեն կվաճառե՞ն: Եվրոպայում սովորական սպառազինությունների մասին համաձայնագիր կա, չէ՞: Դրանով նախատեսված քանակի տանկեր եթե ունես, ապա նույնիսկ պետությանը տանկ չեն վաճառի: Ուր մնաց ինչ-որ մարդու վաճառեն, նա էլ առնի-բերի: Բանակի, Հայաստանի համար գեներալը ինչ կարողացել արել է: Իր ամբողջ գերդաստանին տարել է պատերազմ, 13 հոգի զոհվել են: Այդ թվում` իր երկու հարազատ եղբայրներն են զոհվել: Այսինքն` եթե հնարավորություն ունենար, տանկ էլ կնվիրեր, բայց նախ օրենքի խնդիրներ կան»: Նրա խոսքերով, իրենք գիտեն նույնիսկ, թե ովքեր են տարածում այդ ինֆորմացիան: «Բայց անուններ կնախընտրեմ չտալ, միայն կարող եմ ասել, որ այն մարդիկ են, ովքեր ցանկանում են ԱԺ պատգամավոր ընտրվել և վախենում են, որ կամ Կարենը կդնի, կամ Նազիկը, կամ Գեներալը: Իսկ այդ դեպքում իրենք շանս չեն ունենա, որովհետև ժողովուրդը այս մարդկանց հարգում է ու կընտրի: Հետևաբար` իրենք իրենցից հուշտ եղած, ընկել են սադրանքների հետևից: Այս մարդիկ իսկապես չեն ցանկանում առաջադրվել, ԱԺ պատգամավոր ընտրվել, նման նպատակներ չունեն»,- ավելացրեց Վարդան Վարդանյանը, ով նաև գեներալ Մանվել Գրիգորյանի խորհրդականն է:
