Բեռլինի խորհրդարանի ընտրությունների համար նախատեսված քվեաթերթիկները հայտնաբերվել են աղբարկղում: Այս մասին հինգշաբթի օրը` սեպտեմբերի 22-ին, հայտնել է Der Tagesspiegel թերթը: 379 ընտրողների ձայները հաշվի չեն առնվել, քանի որ անհայտ անձը գցել է քվեաթերթիկները ընտրական հանձնաժողովում դրանց հայտնվելուց առաջ:
Թափված քվեաթերթիկները ընտրությունները սկսվելուց առաջ փոստով ուղարկվել են ընտրատեղամաս: Կորած ձայներն ուղարկվել էին Բեռլինի ամենահարուստ թաղամասերից մեկի` Ցելենդորֆի բնակիչների կողմից: Ընտրական հանձնաժողովը ստիպված է եղել վերահաշվարկել ձայները` հաշվի առնելով հայտնաբերված քվեաթերթիկները:
379 ձայնը չեն կարող ազդեցություն ունենալ վերջնական արդյունքների վրա, քանի որ կուսակցությունների միջև տարբերությունը մեծ է եղել:
Սակայն, ինչպես նշում է թերթը, այս քվեաթերթիկների հաշվարկումից հետո կարող է փոխվել տեղական ինքնակառավարման մարմիններում կուսակցությունների ներկայացվածության հարաբերակցությունը:
Ոստիկանությունն արդեն սկսել է կատարվածի քննությունը, սակայն արդյունքների մասին որևէ տեղեկություն չկա:
Բեռլինում սեպտեմբերի 18-ին կայացած ընտրությունների արդյունքները արդեն մեկ անգամ վերահաշվարկվել են: Ավելի ուշ հայտնի է դարձել, որ ձայների քանակը, որ ստացել են «Կանաչներն» ու «Ձախակողմյան» կուսակցությունը, անփութության պատճառով հակառակ տրցակների մեջ են դրվել: Սրա հետ կապված խորհրդարանում առնվազն մեկ տեղ անցել է Գերմանիայի սոցիալ-դեմոկրատական կուսակցությանից (ԳՍԴԿ) «ձախակողմյաններին»: Ըստ ընտրական հանձնաժողովի ներկայացուցչի՝ սխալմունքի պատճառ է հանդիսացել մարդկային գործոնը: Ձայները տարբեր սյունակներում են գրանցել: