Այսօր Վալերի Բրյուսովի անվան լեզվաբանական համալսարանում հյուրընկալվեց Թուրքիայի եվրոպական մասի Էդիրնե քաղաքի Թրակիայի համալսարանի ռեկտոր, պրոֆեսոր Էնվեր Դուրանը: Ուսանողների հետ հանդիպմանը նա տեղեկացրեց, որ Երևան գալու հիմնական պատճառը կրթական ոլորտում համագործակցությունն է ու իրենց համալսարանում հայագիտության ամբիոն բացելը և հայերեն ու գրականություն դասավանդելը: Նա տեղեկացրեց, որ Թրակիայի համալսարանում դասավանդվում են բալկանյան լեզուներ, ռուսերեն, ռումիներեն, և բավական երկար ժամանակ է, ինչ ցանկանում են բացել հայագիտության ամբիոն, սակայն մասնագետներ չեն կարողանում գտնել:
«Աշխարհը փոքրանում է, գնում է դեպի գլոբալացում: Սա մեզ համար մեծ նախագիծ է: Մեր սահմանները կարող են փոխվել, ղեկավարները` նույնպես, սակայն լեզուն չի փոխվում: Եթե կարողանանք սովորել մեկս մյուսի լեզուն, գուցե կարողանանք խաղաղ ճանապարհով լուծել բոլոր խնդիրները»,- մեկնաբանելով այցի նպատակը՝ ասաց բանախոսը:
Նախագիծն իրականացվում է Թրակիայի համալսարանի և Գերմանիայի Գյոթեի համալսարանի աջակցությամբ:
Հարցին, արդյոք թուրքական իշխանությունները տեղյա՞կ են իր նախաձեռնության մասին, Է. Դուրալը պատասխանեց, որ նախ`իրեն չտան քաղաքականության մասին հարցեր, բացի այդ՝ հավելեց, որ Թուրքիան ժողովրսդավարական երկիր է, ցանկացած ռեկտոր կարող է գնալ ու բացել իր համալսարանում այն բաժինը, որը ցանկանում է:
Իսկ թե ինչու է նման միտք ծագել նրա մեջ, վերջինս պատասխանեց, որ ինչպես հայերի մեջ կա ցանկություն սովորել թուրքերեն, այնպես էլ թուրք ուսանողներն են ուզում սովորել հայերեն:
Նա նաև նշեց, որ Թուրքիայում ներկայումս կան համալսարաններ, որոնք զբաղվում են հայերենի ուսուցմամբ, բայց դեռ լիակատար հաջողությունների չեն հասել: «Կան հիսուն հազար ազգությամբ հայ թուրք քաղաքացիներ, սակայն կա միայն մեկը, որ թուրքերենի ատեստավորված մասնագետ է: Սա թերություն է, մենք կարծում ենք, որ մարդիկ չպետք է մոռանան իրենց մայրենի լեզուն»,- ասաց բանախոսը` ուրախությամբ տեղեկացնելով, որ վերջապես իրենց երեք հոգու թեկնածություն է առաջարկվել, որոնցից էլ կընտրվի թեկնածուն:
Լրագրողներից մեկի այն հարցին` արդյո՞ք չեն ուզում ուսումնասիրել քրդերենը, ռեկտորը դիվանագիտական պատասխան տվեց. «Դա մեր ժողովրդի մայրենի լեզուն է: Ամենայն հավանականությամբ կբացվի»:
Ծրագիրն իրականացվում է Գյոթեի ու Թրակիայի համալսարանների աջակցությամբ: Ներկայում Թրակիայի համալսարանին անհրաժեշտ է երեք հայագետ, որոնց այնտեղ կտրվեն այն նույն արտոնությունները, ինչ թուրք մասնագետներին:
