Երեկ բրիտանական Times Higher Education պարբերականում հրապարակվել է 1915 թվականին Օսմանյան կայսրությունում տեղի ունեցած Հայոց ցեղասպանության վերաբերյալ Ջեկ Գրուվի «Երբևէ մենք իմանալո՞ւ ենք Հայոց ցեղասպանության մասին ճշմարտությունը» խորագրով հոդվածը, որում ասվում է.
«Պատմաբանների մեծ մասը համաձայն է նրա հետ, որ Առաջին համաշխարհային պատերազմի ժամանակ օսմանյան թուրքերն Արևելյան Անատոլիայից (Արևմտյան Հայաստան) հարյուր հազարավոր հայերի բռնագաղթեցրել են դեպի Սիրիական անապատ, ուր նրանք սպանվել են կամ մահացել սովից ու հիվանդություններից։
2007 թվականին 17-ամյա ազգայնականի կողմից սպանվեց հայկական «Ակօս» թերթի խմբագրապետ Հրանտ Դինքը։ Դա տեղի ունեցավ այն բանից հետո, երբ Դինքը դատապարտեց Հայոց ցեղասպանության վերաբերյալ թուրքական պետության ժխտողական դիրքորոշումը։ Այդպիսի հավակնությունների համար Դինքը նաև հետապնդվել էր դատարանի կողմից՝ «Թուրքիային վիրավորելու» մեղադրանքով։ Նույն մեղադրանքով դատական հետապնդումների է ենթարկվել նաև Նոբելյան մրցանակի դափնեկիր, թուրք գրող Օրհան Փամուքը։
Այժմ հայտնի պատմաբանները կրակի վրա յուղ են լցնում՝ վստահեցնելով, թե Հայոց ցեղասպանության ժխտման համար Թուրքիայի ԱԳՆ-ը վճարում է ակադեմիկոսներին։ Օրինակ՝ ԱՄՆ-ի Մասաչուսեթսի նահանգում գտնվող Կլարկի համալսարանի (Clark University) դասախոս Թաներ Աքչամը հունիսին Գլենդելում տեղի ունեցած կոնֆերանսի ժամանակ հայտարարեց, որ գաղտնիության պահպանման պայմաններում իրեն Ստամբուլից հայտնել են, թե Հայոց ցեղասպանության փաստը հերքող գիտնականները մեծ գումարներ են ստացել։
Պատմաբան Աքչամը նշել է. «Եթե դուք Թուրքիայում աշխատում եք Հայոց ցեղասպանության թեմայի վրա և գործածել եք տվյալ եզրույթը, ապա իսկույնևեթ կկորցնեք ձեր աշխատանքը։ Դա հենց այն հիմնական պատճառն է, ինչի համար ոչ մի թուրք գիտնական չի գործածում «Ցեղասպանություն» եզրույթը՝ թեև կան բազմաթիվ լրագրողներ ու հասարակական գործիչներ, որոնք գործածում են այդ եզրույթը։
Եթե ես ցանկանայի աշխատել Թուրքիայում, ապա չէի կարող տեղ գտնել թուրքական համալսարաններում։ Նրանցից ոչ մեկն էլ ինձ աշխատանքի չէր վերցնի, քանի որ դրանից հետո թուրքական կառավարությունը, հանրությունը և ԶԼՄ-ները անմիջապես կսկսեին տեռորի ենթարկել նրանց»։
Սակայն Աքչամը լիահույս է։ Նրա խոսքերով՝ եթե Թուրքիան բացի հայ-թուրքական սահմանը և կարգավորի Հայաստանի հետ իր հարաբերությունները, ապա դա դրական ազդեցություն կունենա Հայոց ցեղասպանության ոլորտում հետազոտությունների անցկացման վրա։ Երկու երկրների հարաբերությունների կարգավորումը կարևոր քայլ կհանդիսանա տվյալ ոլորտում առավել անկախ գիտական հետազոտություններ անցկացնելու առումով»։
Հիշեցնենք, որ ավելի վաղ Թաներ Աքչամը հայտարարել էր. «Հայոց ցեղասպանությունն իսկական Ցեղասպանություն է, այլ ոչ թե ջարդ, սպանություն կամ այլ բան: Ես կասեի՝ եթե 1915-ին տեղի ունեցածը Ցեղասպանություն չանվանենք, այդ դեպքում պետք է ասել, որ որևէ ցեղասպանություն չի եղել աշխարհում: Սա է իմ տրամաբանությունը՝ իրերը պետք է կոչվեն իրենց անուններով, որպեսզի կարողանանք ճիշտ վերաբերվել դրանց»։
