Ադրբեջանական Trend լրատվական գործակալության փոխանցմամբ՝ Վրաստանի նախագահ Միխեիլ Սաակաշվիլին ելույթ է ունեցել ՄԱԿ-ի Գլխավոր ասամբլեայի 66-րդ նիստում, որում հայտարարել է, թե ԽՍՀՄ-ի փլուզումը 20-րդ դարի խոշորագույն աշխարհաքաղաքական աղետը չէր.
«Այս տարի աշխարհը տոնում է Խորհրդային միության փլուզման և սառը պատերազմի ավարտի 20-ամյակը։ 20 տարի առաջ փլուզվեց Խորհրդային միությունը՝ ազատելով ճնշված ժողովուրդներին ու իրականացնելով միլիոնավոր անձանց երազանքը։ Դրանով վերջ տրվեց տասնամյակներ շարունակվող սառը պատերազմին և միջուկային սպառազինությունների կործանիչ մրցավազքին, միջազգային հարաբերություններում բացվեց նոր դարաշրջան։
Սակայն խնդիրները մնացին։ Հարձակումները Նյու Յորքում և Վաշինգտոնում ուղղված չէին մեկ երկրի դեմ, դրանք ուղղված էին մարդկային արժեքների ու կերպարի դեմ։ Դրանից 10 տարի անց արաբական աշխարհում սկսված ապստամբությունները մեզ հերթական անգամ ապացուցեցին, որ գոյություն չունի պատմության որևէ ավարտ, ինչպես որ գոյություն չունի քաղաքակրթությունների բախում։
Համայն աշխարհում տիրանները սկսում են վախենալ, թե կարող են պատասխանատվության ենթարկվել իրենց գործած հանցագործությունների համար։ Ժամանակն է հասկանալ, որ աշխարհը փոխվել է, որ բանակը, անկախ նրա հզորության աստիճանից, վերջին հաշվով, չի կարող անտեսել ժողովրդի կամքը, որ կառավարությունը, անկախ նրա ուժգնության աստիճանից, չի կարող միակողմանիորեն մասնատել ինքնիշխան պետություններին, ինչին մենք ականատես ենք եղել 1938 և անգամ 1968, ինչպես նաև 2011 թվականներին։
Բոլոր նրանց (Ռուսաստան.- 1in.am) համար, ովքեր դեռևս սպառնալիք են դիտարկում ԵՄ-ի ու ՆԱՏՕ-ի ընդլայնումը, ես կցանկանայի ասել, որ սառը պատերազմն ավարտվել է 1991 թվականի դեկտեմբերին, որ նրանք չպետք է վախենան ԵՄ-ին ու ՆԱՏՕ-ին անդամակցել ցանկացող իրենց ժողովրդավարական հարևաններից։ Նրանք պետք է հասկանան, որ օրակարագում գոյություն չունի Վաշինգտոնի կամ Բրյուսելի հետ գաղտնի դավադրություն, որը կարող է սպառնալ իրենց ինքնիշխանությանը»։
Հիշեցնենք, որ ավելի վաղ Ռուսաստանի ներկայիս վարչապետ Վլադիմիր Պուտինը Խորհրդային միության անկումը որակել է որպես 20-րդ դարի խոշորագույն աշխարհաքաղաքական աղետ։
