Հոկտեմբերի 1-ից Սևանի հանգստյան սեզոնը կհամարվի փակված, և փրկարարները կաշխատեն հերթափոխով, բայց դա չի նշանակում, որ ձմռանը ցանկացողները չեն կարող Սևանում իրենց հանգիստն անցկացնել: Այդ մասին այսօր հրավիրված մամուլի ասուլիսի ընթացքում հայտարարեց ԱԻՆ ջրափրկարարական հատուկ ջոկատի հրամանատար Սամվել Մկրտչյանը:
Ինչ վերաբերում է ջրահեղձման դեպքերին, մինչև օգոստոսի 8-ը, բարեբախտաբար, նման դեպք չի գրանցվել օգոսոտոսի 8-ին միանգամից երեք դեպք է գրանցվել, որոնց նպաստել են ուժեղ քամին և ալեկոծությունը: Ջրահեղձվածներից 2-ը անսթափ վիճակում են եղել, իսկ մեկը նետվել է գլխարկի հետևից, և լավ լողալ չիմանալու արդյունքում խեղդվել է, բացի այդ` երկու հոգի էլ ջրում կաթվածից են մահացել: Մի քանի օր առաջ հայտնաբերվել է մի հոգու դի, որի անձը մինչ օրս պարզված չէ: Այս տարի Սևանում փրկվել է 27 հոգի, սակայն, ըստ Մկրտչյանի, նրանց թիվը մեծ է, բայց նրանք հիմնականում չեն գրանցվել: Ամենավտանգավորը համարվում է Ճամբարակի հատվածը:
Հարցին թե փրկարարները քանիսն են և արդյոք նրանց թիվը բավական է փրկարարական աշխատանք կատարելու համար, Մկրտչյանը պատասխանեց, որ ջրափրկարարները ներկա պահին 31 են` նախատեսված 37-ի փոխարեն, սակայն շուտով նրանց կմիանան 6 նոր ստաժորներ, ովքեր նախապատրաստական դասընթացներ են անցնում:
