Ադրբեջանական Salam News-ին տված հարցազրույցի ժամանակ հայտնի ռուս քաղաքագետ և փորձագետ Գրիգորի Տրոֆիմչուկը հայտարարել է, որ Հայաստանին, Ադրբեջանին և Ռուսաստանին սպասվում են ավելի մեծ խնդիրներ, քան ղարաբաղյան հակամարտությունն է.
«Մոտ ապագայում Հարավային Կովկասը մասնատվելու է քաղաքական և ռազմական տեսանկյունից։ Վրաստանը կթեքվի դեպի Արևմուտք, իսկ Հայաստանն ու Ադրբեջանը, մոռացության մատնելով ղարաբաղյան հիմնախնդիրը, ստիպված կլինեն հաշվի նստել այն արտաքին քաղաքական գործոնների հետ, որոնք ձևավորվելու են Հարավային Կովկասի երկայնքով։
Արդեն Հայաստանը, Ադրբեջանը և Ռուսաստանը ժամանակ չեն ունենա հետագայում նույնպես քննարկել բավական երկար ժամանակ ձգձգվող ղարաբաղյան հիմնախնդիրը։ Նրանց շուրջ կառաջանան այնպիսի խնդիրներ, որոնք մոտ ապագայում և միջին հեռանկարում ավելի վտանգավոր կլինեն, քան ղարաբաղյան հիմնախնդիրը։
Դրա համար էլ պետք է հավաքվել և խորհել նաև այդ թեմաների շուրջը։ Հակառակ դեպքում ուշ կլինի։ Այդ պատճառով ես Հայաստանին, Ադրբեջանին և Ռուսաստանին առաջարկում եմ հավաքվել և քննարկել այդ բոլոր հարցերը՝ ներառյալ ապագա ռազմա-քաղաքական զարգացումները։
Թուրքիայի ակտիվության շնորհիվ մենք կարող ենք դատել, թե ինչպիսի արագությամբ են զարգանում իրադարձությունները Մերձավոր Արևելքում և Հարավային Կովկասում։ Թուրքիայի հեղինակությունն ամրապնդվում է՝ սակայն միայն մոտակա կարճատև պատմական ժամանակաշրջանում։ Ես կարծում եմ, որ արևմտյան կոալիցիայի համար Հարավային Կովկասում անհրաժեշտ չէ այնպիսի ուժեղ ֆիգուր, ինչպիսին Թուրքիան է։
Ներկայումս Թուրքիան իր տարածքում ռադարի տեղակայմամբ միանգամից լուծում է նվազագույնը երկու լուրջ առաջադրանք. ա) էլեկտրոնային ճանապարհով նա հավելյալ վերահսկողություն է ձեռք բերում Հարավային Կովկասի վրա, բ) նույնպիսի վերահսկողություն է հաստատվում Իրանի և Ռուսաստանի նկատմամբ։ Բացի այդ, ռադարի տեղակայման հարցում իրենց դերն ունեն թուրք-սիրիական և թուրք-իսրայելական ներկայիս հարաբերությունները»։
Ի պատասխան այն հարցին, թե «վտանգավոր խնդիրներ» արտահայտության տակ ինչ նկատի ունի՝ ռուս փորձագետը նշել է. «Խոսքը վարչակարգերի փոփոխության մասին է։ Պարզապես այդպիսի իրավիճակում այդ երկրների ժողովուրդները չեն կարող ազդել իրավիճակի վրա։ Դրա վրա ազդելու են այն ուժերը, ովքեր երբեք մուտք չեն գործել տարածաշրջան։
Ադրբեջանի կամ Հայաստանի ժողովրդից ոչ ոք ոչինչ չի հարցնելու, ինչին որ ականատես ենք եղել Լիբիայի պարագայում։ Բացառված չէ, որ Ադրբեջանում և Հայաստանում, ինչպես նաև հետխորհրդային մի շարք երկրներում իրադարձությունները զարգանան լիբիական սցենարով։ Դա վերաբերում է նաև Ռուսաստանին»։