Դերասան Միքայել Պողոսյանը, «Առաջին լրատվական»-ի հետ զրույցում հայ ժողովրդին շնորհավորելով Հայաստանի անկախության 20-ամյակի կապակցությամբ, անդրադառնալով «Հայաստանը դու ես» կարգախոսին, ասաց, որ այդ կարգախոսի փոխարեն ինքը կասեր` «Հայաստանը ես եմ»:
«Ամեն մեկը եթե գիտակցի, որ, իրոք, հայրենիքի բոլոր պրոբլեմների, բոլոր վերելքների հեղինակներից մեկը ինքն է, անպայման չէ՝ կոնկրետ քո մասնակցությունն ունենաս, բայց այն փաստը, որ դու Հայաստանում ես ապրում, գործով ես զբաղվում, ուրեմն ամեն լավի ու վատի պատասխանատուն դու ես»,- ասաց դերասանը:
Նրա խոսքով` եթե յուրաքանչյուր հայ ունենա դրա գիտակցությունը, ամեն մեկը հասկանա, որ այս երկրագնդի վրա ինքը կարևոր բջիջներից մեկն է, որի էներգետիկան բարձրանում է վեր, և ըստ դրա է վերևում որոշվում` բարիքները որտեղ կթափվեն և ինչ ձևով, ամեն ինչ լավ կլինի:
«Մարդն իր ողջ կենսակերպով ու էությամբ որոշում է տիեզերքի լավ ու վատ լինելը»,- համոզմունքն հայտնեց Մ. Պողոսյանը` ընդգծելով, որ Աստված հայերին բաշխել է շատ շնորհներ, որոնք դեռ ամբողջությամբ չենք կարողանում գիտակցել:
