1783-1784թթ.-ին Լաքի հրաբուխը, որը գտնվում է Իսլանդիայի հարավում գտնվող Սքաֆթաֆետլ ազգային պարկում` Քիրքյուբեյարքլաուստուր քաղաքից ոչ հեռու, մթնոլորտ է արտանետել ավելի քան 122 մլն տոննա ծծումբի երկօքսիդ: Համեմատության կարգով ասենք, որ սա մի քիչ ավելի է համաշխարհային արդյունաբերության տարեկան արտանետումներից: Ըստ պատմաբանների` դրա արդյունքում մահացել է Իսլանդիայի բնակչության հինգերորդ մասը (ավելի քան 10 հազար մարդ) և տնային կենդանիների երեք քառորդը: Բացի այդ, մահացության բարձր ցուցանիշ է գրանցվել Նիդեռլանդներում, Շվեդիայում և Մեծ Բրիտանիայում:
Հաշվի առնելով, որ ըստ գիտնականների, վերջին 1150 տարիների ընթացքում տեղի է ունեցել առնվազն 4 նմանատիպ ժայթքում, գիտնականները մոդելավորել են մեր օրերում նման իրադարձության հետևանքները: Նրանք եկել են այն եզրակացության, որ 2,5 միկրոմետր շառավիղ ունեցող մասնիկների կուտակումը Եվրոպայում կկրկնապատկվի ժայթքումից երեք ամիս հետո: Արդյունքում սրտի և թոքերի հետ կապված խնդիրների հետևանքով կմահանա 142 հազար մարդ (սա երկու անգամ ավելի է տարեկան գրիպից մահացողների քանակից):
Իրենց աշխատության շրջանակներում գիտնականները հաշվի չէին առել տնտեսության համար նման ժայթքումների հետևանքները: 2011թ.-ի ապրիլին Proceedings of the National Academy of Sciences-ում հրապարակված հոդվածում գիտնականները գնահատել են իրական վտանգը, որն իրենից ներկայացրել է Էյաֆյատլայոկուդլա հրաբուխը: Ինչպես պարզվել է, այն մասնիկները, որոնք արտանետվել են հրաբխից, ունեցել են անկանոն ձև, այդ իսկ պատճառով վտանգ են ներկայացրել թոքերի համար, ինչպես նաև իրենց մակերեսի վրա կարող են մեծ քանակությամբ վնասակար նյութեր տեղափոխել:
