Երեկ «Առաջին լրատվականը» հաղորդել էր, որ վարչապետ Տիգրան Սարգսյանն աշխատանքային այցով գտնվում է Բրյուսելում, որտեղ հանդիպումներ է անցկացնում ինչպես Բելգիայի իշխանությունների, այնպես էլ Եվրոպական Միության պատասխանատուների հետ: Երեկ նա հանդիպում է ունեցել Եվրամիության ընդարձակման և հարևանության հարցերով հանձնակատար Շտեֆան Ֆյուլեի հետ, որը հայտարարել է, որ ԵՄ-ն կանաչ լույս է վառել Հայաստանի հետ վիզային ռեժիմի հեշտացման շուրջ բանակցություններ սկսելու ճանապարհին և հիմա սպասում է անդամ երկրների հավանությանը: Այս մասին հաղորդում է «Ազատություն» ռադիոկայանի հայկական ծառայությունը:
«Ուրախ եմ հայտարարել, որ Եվրահանձնաժողովը հենց նոր հաստատել է բանակցային դիրեկտիվները` Հայաստանի հետ անցագրային ռեժիմի հեշտացման և ապօրինի միգրանտների վերադարձի համաձայնագրի շուրջ բանակցություններ սկսելու համար: Մենք պատրաստ ենք սկսել բանակցությունները, հենց որ Եվրամիության բարձրագույն քաղաքական մարմինը` Խորհուրդը հաստատի այդ մանդատը»,- ասել է հանձնակատարը:
Շտեֆան Ֆյուլեի խոսքով, Հայաստանը տեսանելի առաջընթաց է արձանագրել անհրաժեշտ բարեփոխումների իրագործման ճանապարհին, և եթե այդ միտումը շարունակվի, առաջիկայում Բրյուսելից է’լ ավելի մեծ աջակցություն կստանա:
«Ես վստահեցրի Հայաստանի վարչապետին, որ Եվրամիությունը պատրաստ է շարունակել աջակցությունը` երկրում ներքին բարեփոխումների հավակնոտ օրակարգը է’լ ավելի առաջ տանելու ուղղությամբ: Միևնույն ժամանակ, ուզում եմ նշել, որ այս տարվա ընթացքում Եվրամիությունն արդեն իսկ կրկնապատկել է օժանդակությունը Հայաստանին»,- ասել է Ֆյուլեն և հիշեցրել կառույցի` «որքան շատ բարեփոխումներ, այնքան շատ աջակցություն» կարգախոսը:
Իր հերթին, Հայաստանի վարչապետը հավաստիացրել է, թե պաշտոնական Երևանը ոչ միայն հավատարիմ է բարեփոխումները շարունակելու հանձնառությանը, այլև պատրաստվում է դրանց նոր թափ հաղորդել:
«Մենք մտքերի փոխանակություն իրականացրինք մեր ծրագրերի կատարողականի վերաբերյալ, ինչպես նաև ներկայացրինք մի նոր օրակարգ, որը բաղկացած է երեսուներեք միջոցառումներից և նպատակ ունի նոր թափ հաղորդել բարեփոխումներին Եվրամիության «Արևելյան հարևանություն» ծրագրի շրջանակներում: Մենք համոզված ենք, որ ամբողջությամբ ի վիճակի ենք կատարել մեր ստանձնած պարտավորությունները»,- հայտարարել է Տիգրան Սարգսյանը և հույս հայտնել, թե շատ շուտով Եվրամիությունը կհայտարարի նաև Հայաստանի հետ Ազատ առևտրի համաձայնագրի շուրջ բանակցություններ սկսելու մասին:
Քաջալերելով Հայաստանի իշխանություններին կատարված բարեփոխումների համար` Եվրամիության ընդարձակման և հարևանության հարցերով հանձնակատարը նշել է, որ դեռևս «անելու շատ բան կա»:
«Տասն օրից Լեհաստանում կմեկնարկի Արևելյան գործընկերության գագաթնաժողովը, մի շատ կարևոր հիմնաքար այս քաղաքականության զարգացման ճանապարհին, որը կվերահաստատի մեր երկկողմ հանձնառությունը և կստեղծի մի կարևոր բեկումնային պահ Արևելյան գործընկերության անդամ երկրներին Եվրամիությանը է’լ ավելի մոտեցնելու համար»,- ասել է Շտեֆան Ֆյուլեն:
