Թուրքական Hürriyet թերթի փոխանցմամբ՝ թուրքական ընդդիմության առաջնորդ, Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուն մեկնաբանել է Նորվեգիայի մայրաքաղաք Օսլոյում Ազգային հետախուզական կազմակերպության (MIT) և Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) ներկայացուցիչների միջև հանդիպումը.
«Օսլոյում MIT-ի ու PKK-ի ներկայացուցիչների միջև տեղի ունեցած այդ տխրահռչակ հանդիպումը կազմակերպել է Թուրքիայի վարչապետական ապարատը։ Էրդողանը հայտարարել է, թե այդ կապակցությամբ անհնար է զոհաբերել (պաշտոնից հեռացնել) MIT-ի ղեկավար Հաքան Ֆիդանին։ Հասկանալի է, թե նա ինչու է անհնար համարում այդպիսի զոհաբերություն կատարելը։ Չէ՞ որ Ֆիդանը կատարել է անձամբ Էրդողանի ցուցումը։
Անկասկած է, որ Օսլոյի բանակցությունները տեղի չեն ունեցել MIT-ի ու PKK-ի միջև։ Դրանք ընթացել են վարչապետի հատուկ ներկայացուցիչների ու PKK-ի միջև։ Այդ հանդիպման ժամանակ Ֆիդանը կատարում էր վարչապետական ապարատի խորհրդականի օգնականի դերը։ Ֆիդանն ինքն է խոստովանել, որ նա Էրդողանի ներկայացուցիչն է։ Ինչո՞ւ լրագրողներն այդ մասին չեն հարցնում Էրդողանին։
Բնականաբար, Էրդողանը չի զոհաբերի այն մարդուն, որին հենց ինքն է գործուղել այդ հանդիպման։ Էրդողանն այլընտրանք չունի, քան հրապարակավ ներողություն խնդրելը»։
Հիշեցնենք, որ Էրդողանը, մեկնաբանելով MIT-ի ու PKK-ի ներկայացուցիչների միջև բանակցությունների սենսացիոն աուդիոձայնագրությունը, հայտարարել էր.
«Ներկայումս տարվում է հետաքննություն՝ կապված այդ աուդիոձայնագրության տարածման հետ։ Բայց եթե անգամ MIT-ը թերացումներ է ունեցել, մենք չենք կարող դրա համար զոհաբերել MIT-ի ղեկավար Հաքան Ֆիդանին։
Այս գործի հետաքննման համար ես Ֆիդանին խնդրեցի չուղեկցել ինձ արաբական երկրներ (Եգիպտոս, Թունիս, Լիբիա) կատարած շրջագայության ժամանակ և մնալ երկրում։ Մենք հետաքննում ենք այդ տեղեկատվական արտահոսքի դեպքը և չենք կարող առանց հիմնավոր պատճառների զոհաբերումներ կատարել։ Ինձ հայտնի է, որ մի շարք շրջանակներ նախկինում նույնպես դավեր են նյութել Հաքան Ֆիդանի դեմ։ Ոչ ոք չի շահի այդ հիմար իրավիճակից»։
Ի դեպ, MIT-ի փոխտնօրեն աշխատած ժամանակ Ֆիդանը եղել է նաև արտաքին քաղաքականության գծով Էրդողանի խորհրդականը և համարվում է Էրդողանի վստահելի մարդկանցից մեկը:
