Ռուսական Regnum լրատվական գործակալության փոխանցմամբ՝ Թուրքիայի ԱԳՆ-ը կտրուկ է արձագանքել հունական և կիպրական ընկերությունների կողմից Միջերկրական ծովի շելֆի հետախուզման պլաններին։
Թուրքիայի արտգործնախարար Ահմեդ Դավութօղլուն հայտարարել է. «Եթե դա իրողություն դառնա, ապա մենք կձեռնարկենք մեր քայլերը։ Դրանցից մեկը կլինի Թուրքիայի ևւ (ինքնահռչակ) Հյուսիսային Կիպրոսի միջև ծովային սահմանի մասին ակտի կնքումը և Հյուսիսային Կիպրոսում նմանատիպ նավթի որոնման աշխատանքների իրականացումը՝ Turkish Petroleum ընկերության մասնակցությամբ։ Թուրքիայի էներգետիկայի նախարարությունը տվյալ հարցի շուրջ անհրաժեշտ բանակցություններ է վարում Հյուսիսային Կիպրոսում»։
Հիշեցնենք, որ Կիպրոսը սեպտեմբերի 16-ին Միջերկրական ծովում՝ իր՝ բացառապես տնտեսական գոտում, տեղակայել է հետախուզա-հորատման սարքավորում։ Հորատման աշխատանքները մեկնարկելու են սեպտեմբերի 21-ին, դրանք իրականացնելու է ամերիկյան Noble Energy ընկերությունը։
Դրանից առաջ թուրք պետնախարար, ԵՄ-ին Թուրքիայի անդամակցության գծով գլխավոր բանագնաց Էգեմեն Բաղըշը հանդես էր եկել Կիպրոսի հանդեպ ակնհայտ սպառնալիքներով՝ հայտարարելով, որ եթե նա հորատում իրականացնի, Թուրքիան դրան ռազմական պատասխան կտա.
«Մեր ռազմանավերը կտեղակայվեն տվյալ տարածաշրջանում։ Հենց դրա համար ենք մենք ստեղծել հզոր բանակ, և հենց դրա համար ենք մարզում մեր զինվորներին։ Նրանք չեն կարող հորատում անցկացնել այն վայրում, որը չի պատկանում իրենց»։
