ՌԴ ԱԳ նախարար Սերգեյ Լավրովը «Известия» թերթին տված հարցազրույցում անդրադարձել է ՀՀ ԱԳ նախարար Արարատ Միրզոյանի հետ վերջին հանդիպմանը և լրագրողի պնդմանը, որ Ռուսաստանի դեմ Արևմուտքի քաղաքականության նպատակներից մեկը Հայաստանը նրա ազդեցության գոտուց հանելն է․
«Նման կանխատեսումներ չեմ անի։ Մենք մեր բոլոր գնահատականներն ազնվորեն ներկայացրել ենք Հայաստանի ղեկավարությանը։ Նրանք շատ լավ գիտեն, որ մենք հավատարիմ ենք մնում մեր պարտավորություններին, որ պատրաստ ենք շարունակել նպաստել Ադրբեջանի հետ իրենց հարաբերությունների կարգավորմանը և այդ գործընթացը հասցնել ամբողջական ավարտին։ Նրանք գիտեն, որ իրավիճակի կայունացման, Երևանի և Բաքվի հարաբերությունների վերականգնման հարցում մեր անկեղծ շահագրգռվածության ֆոնին Եվրամիությունն ու ՆԱՏՕ-ն այդ գործընթացը խոչընդոտող քայլեր են անում։ Վերջերս Ադրբեջանի ղեկավարությունը բողոքում էր որոշ գործողությունների և հայտարարությունների դեմ, այդ թվում՝ կապված Հայաստանում Եվրամիության առաքելության գործառույթների և կազմի ընդլայնման հետ: Մենք երբեք չենք հրաժարվում մեր պայմանավորվածություններից։ Բայց վերջերս նրանք մեզ վրա դուրս չեն եկել։ Հայաստանի արտաքին գործերի նախարար Ա.Ս. Միրզոյանի հետ վերջին անգամ շփվել եմ 2023թ. նոյեմբերին՝ Մակեդոնիայի մայրաքաղաք Սկոպյեում կայացած ԵԱՀԿ նախարարական հանդիպման ժամանակ։ Հանդիպումը մենք ենք առաջարկել։ Նրանք դա չեն խնդրել, բայց ես իմ գործընկեր Ա. Ս. Միրզոյանին ևս մեկ անգամ հաստատեցի այն ամենը, ինչի մասին մենք հիմա խոսում ենք։ Նրանք գիտեն մեր դիրքորոշումը։ Մեր դեսպան Ս. Կոպիրկինը պարբերաբար հիշեցնում է այդ դիրքորոշման մասին», – նշել է Լավրովը։
