Ղազախստանի նախագահ Տոկաեւը Աստանայում ընդունելով Կիպրոսի արտաքին գործերի նախարարին, նրան շնորհակալություն է հայտնել Ղազախստանում դեսպանատուն բացելու մտադրության համար, նշելով, որ դա կօգնի խորացնել ղզախ-կիպրական փոխհարաբերությունը: Մի քանի օր առաջ Կիպրոսի արտգործնախարարը Հայաստանում էր եւ նրա այցի ընթացքում հայտարարվեց, որ պաշտոնական Նիկոսիան որոշել է դեսպանատուն բացել նաեւ Երեւանում:
Առաջին հայացքից, Հայաստանում եւ Ղազախստանում դեսպանատուն բացելու մտադրությունը կարող է ունենալ ընդամենը տեխնիկական կապ, սակայն արդյո՞ք ներկայիս աշխարհաքաղաքական իրողությունների եւ միջազգային հարաբերությունների ռեժիմում այդօրինակ հարցերը կսահմանափակվեն լոկ տեխնիկականով, առավել եւս, որ առնչվում են աշխարհաքաղաքական զգայուն կետերի՝ Կովկաս եւ Կենտրոնական Ասիա: Կիպրոսն իհարկե ինքն էլ մի կետ է աշխարհաքաղաքական քարտեզում, շատ համեստ մի դերակատար, եւ թվում է, որ հազիվ թե այդ համեստությամբ հանդերձ ներգրավվի աշխարհաքաղաքական մեծ խաղում: Բայց, կա փաստ, եւ ինչպես նշեցի, այդ փաստը բոլորովին տեխնիկական չէ, այլ՝ քաղաքական, որովհետեւ իր մասշտաբային համեստությամբ հանդերձ, Կիպրոսն ինքն էլ այդուհանդերձ քաղաքական բավականին բազմաշերտ երեւույթ է արտաքին փոխհարաբերությունների կամ կապակցվածությունների իմաստով:
Հատկաես, եթե նկատենք եւ այն, որ Կիպրոսը համաշխարհային օֆշորներից մեյն է, որոնք պահում են ոչ միայն փողեր, այլ ըստ էության նաեւ մեծ քաղաքականության հետ դրանց խորհրդավոր կապեր: Ահա այդ տեսանկյունից, օրինակ, Նիկոսիան մի կողմից աչքի է ընկնում Թոււրքիայի եւ Ադրբեջանի հետ Հայաստանի հարաբերություններում առկա մարտահրավերների հարցում Երեւանին տրվող ուժեղ քաղաքական աջակցությամբ, մյուս կողմից նաեւ քաղաքական ներկայության ընդլանում է ծրագրում Կենտրոնական Ասիայի առանցքային երկրում, որը նաեւ Թյուրքալեզու պետությունների կազմակերպության անդամ է, ըստ էության Ադրբեջանի եւ Թոււրքիայի դաշնակից, եւ նույնիսկ այդ կազմակերպության կենտրոններից մեկը, եթե հաշվի առնենք, որ Ղազախստանի Թուրքեստան քաղաքը հռչակվել է Թյուրքալեզու պետությունների կազմակերպության մշակութային կենտրոն:
Ինչպես հայտնի է, Հայաստանը Կիպրոսի հետ փոխհարաբերության իմաստով ապավինում է ոչ միայն երկկողմ, այլ նաեւ՝ Հունաստան-Հայաստան-Կիպրոս եռակողմ ձեւաչափին: Միեւնույն ժամանակ, եթե հաշվի առնենք այն, որ Եվրամիության անդամ Կիպրոսը ռազմա-քաղաքական առումով բավականին սերտ գործակցություն ունի Բրիտանիայի հետ, միաժամանակ Թուրքիայի հետ ունենալով նաեւ Հյուսիսային Կիպրոսի հակամարտությունը, ապա բավականին պարզորոշ ուրվագծվում է, որ Կովկասից Կենտրոնական Ասիա աշխարհաքաղաքական մեծ խաղում բացվում է «կիպրական գիծ», բազմաթիվ բաժնետերերով, միաժամանակ դիվիդենտների անորոշությամբ: Ի դեպ, բոլորովին վերջերս Հայաստանում էր ոչ միայն Կիպրոսի արտգործնախարարը, այլ նաեւ Ղազախստանի, որը Երեւան ժամանեց Ղազախստանի նախագահի Բաքու կատարած այցից մի քանի օր անց: