Իսրայելական Mig News-ի փոխանցմամբ՝ CNN Türk-ին տված հարցազրույցի ժամանակ Թուրքիայի արտգործնախարար Ահմեդ Դավութօղլուն հայտարարել է, որ Անկարան վետո է դնելու Բրյուսելում գտնվող ՆԱՏՕ-ի շտաբ-կայանում իսրայելական ներկայացուցչության բացման վերաբերյալ Իսրայելի առաջարկի վրա։
Նշվում է, որ այս տարի Իսրայելն արդեն իսկ ջանքեր է գործադրել՝ ՆԱՏՕ-ում սեփական ներկայացուցչության բացման համար, ինչը միտված է Միջերկրական ծովում ՆԱՏՕ-ի հետ համագործակցելուն։ Իսրայելն իր այս գործողությունները համաձայնեցրել է ԱՄՆ-ի հետ։
Այս տարվա ապրիլին Բեռլինում տեղի ունեցած ՆԱՏՕ-ի արտգործնախարարների մակարդակով կոնֆերանսի ժամանակ քննարկվել է այդ հարցը, սակայն Թուրքիան ընդդիմացել է դրան՝ պատճառաբանելով դա անցած տարվա մայիսի վերջին «Մավի Մարմարա»-ի միջադեպի շուրջ Իսրայելի որդեգրած դիրքորոշմամբ։
Ներկայումս, սակայն, թուրք դիվանագետները հայտարարում են, որ Իսրայելի առաջարկի վրա վետո դնելու իրենց որոշումն անբեկանելի չէ և կախված է քաղաքական իրավիճակից։
Հիշեցնենք, որ ՆԱՏՕ-ում բոլոր որոշումներն ընդունվում են կոնսենսուսի հիման վրա, ինչը նշանակում է, որ նրա յուրաքանչյուր անդամ կարող է վետո դնել քննարկվող նախագծի վրա: Այսինքն՝ քվեարկության ժամանակ անհրաժեշտ է, որ ՆԱՏՕ-ի անդամ բոլոր երկրները կողմ քվեարկեն Իսրայելի նախագծին, և եթե անգամ մեկ երկիր (ասենք՝ Թուրքիան) դեմ քվեարկի դրան, ապա նախագիծը կտապալվի։