«Ֆրանսիայի նախագահ Նիկոլա Սարկոզին բավականին լուրջ քննարկումներ կանցկացնի մեր տարածաշրջանում առկա հակամարտությունների վերաբերյալ, այդ թվում՝ Լեռնային Ղարաբաղի գծով: Կարծում եմ՝ նա Ֆրանսիայի, ԱՄՆ-ի և Եվրամիության անունից ելույթ կունենա Հարավային Կովկասի հակամարտությունների մասին»: Այս մասին հայտարարել է Ադրբեջանի «Քաղաքական ինովացիաների և տեխնոլոգիաների կենտրոնի» տնօրեն Մուբարիզ Ահմեդօղլուն:
Ինչպես հայտնում է SalamNews-ը, նրա խոսքերով՝ Սարկոզին Հայաստանում կքննարկի հայ-ֆրանսիական տնտեսական համատեղ խոշոր ծրագրերի իրականացման հնարավորությունները: «Նախկինում Ֆրանսիայի նախկին նախագահ Ժակ Շիրակը փորձել էր Հայաստանում տնտեսական խոշոր ծրագրեր իրականացնել, սակայն հետագայում ֆրանսիացիները կասկածել էին, որ հայերը պաշտպանում են բացառապես Ռուսաստանի շահերը Հարավային Կովկասում: Սարկոզին կփորձի դուրս մղել Ռուսաստանին Հայաստանի տնտեսությունից և իրականացնել նախկինում պատրաստած ծրագրերը»,- հայտնել է Ահմեդօղլուն:
Հիշեցնենք, որ Ֆրանսիայի նախագահի տարածաշրջանային այցը կմեկնարկի հոկտեմբերի 6-ին: Այդ օրը Սարկոզին կժամանի Երևան:
