Իսրայելի զինվորականները հայտարարել են, որ տվյալներ ունեն այն մասին, որ ՄԱԿ-ի Մերձավոր Արևելքում պաղեստինցի փախստականների օգնության և աշխատանքների գործակալության (ՄԱՕԱԳ) ավելի քան 450 աշխատակից մասնակից է եղել Գազայի հատվածում ահաբեկչական գործունեությանը: Այդ մասին ճեպազրույցում հայտարարել է Իսրայելի պաշտպանության բանակի պաշտոնական ներկայացուցիչ Դանիել Հագարին։
«ՄԱՕԱԳ-ի ավելի քան 450 աշխատակից Գազայում ահաբեկչական խմբավորումների զինյալներ են: Սա պարզ զուգադիպություն չէ, սա համակարգային երևույթ է», – նրա խոսքերն է մեջբերում ՏԱՍՍ-ը:
Բանակի ներկայացուցչի վարկածի համաձայն՝ պաղեստինյան արմատական ՀԱՄԱՍ շարժումը «շահագործում է մարդասիրական կազմակերպությունները և դրանք օգտագործում մարդկության դեմ հանցագործություններ կատարելու համար»։
Իր հերթին ՄԱՕԱԳ-ի գլխավոր հանձնակատար Ֆիլիպ Լազարինին ճեպազրույցում հայտնել է, որ Իսրայելի իշխանություններն ապացույցներ չեն ներկայացրել այն մասին, որ ՄԱԿ-ի գործակալության որևէ աշխատակից մասնակից է եղել պաղեստինյան արմատական ՀԱՄԱՍ շարժման գործունեությանը, այդ թվում՝ 2023 թվականի հոկտեմբերի 7-ի գրոհին:
«Միակ բանը, որ իմ ուշադրությանն է արժանացել, մեղադրանքներն են, – ասել է նա։ – Որևէ հիմնավորում կամ ապացույց չի ներկայացվել»։
