Օրեր առաջ Լոռու մարզում խայտառակ դեպք է գրանցվել: Ալավերդցի, 1990թ. ծնված երիտասարդը բռնաբարել է 82-ամյա միայնակ տատիկին: Նախնական տեղեկություններով, տղան ծեր կնոջից նախ պահանջել է ունեցած փողն ու ոսկեղենը, ապա տեսնելով, որ տատիկը համառում է, բռնաբարել է նրան:
Նախնական տվյալներով, ծեր կինը երբևէ ամուսնացած չի եղել, ավելին` եղել է կույս: Այնինչ, «Առաջին լրատվական»-ին հաջողվեց պարզել, որ 82-ամյա տատիկն ամենևին էլ կույս չի եղել: Ամբողջ կյանքում գյուղական աշխատանքով զբաղված կինը ամուսնացած եղել է: Ամուսնու երկրորդ կինն էր, ով վաղուց այրիացել էր: Պարզապես համատեղ կյանքի ընթացքում նրանք երեխաներ չեն ունեցել: Միանշանակ է, որ ծեր կինը բռնաբարությունից առաջ կույս չի եղել, ինչպես նախնական վարկածով նշված էր տարածված տեղեկատվության մեջ: Ինչևէ, բռնաբարությունից հետո Լոռու մարզի քննչական բաժնի Թումանյանի բաժանմունքում քրեական գործ է հարուցվել բռնաբարության և կողոպուտի հատկանիշներով:
Դեպքը տեղի է ունեցել Ալավերդի քաղաքի «Ռուսական ձոր» կոչվող թաղամասի սեփական տներից մեկում, որի բնակիչ, 82-ամյա Ռոզա Մոսինյանը հայտարարություն էր տվել ոստիկանությունում, որ սեպտեմբերի 4-ին, ժամը 19.20-ի սահմաններում մի երիտասարդ բռնաբարել է իրեն և գողացել ոսկյա զարդեր: Ոստիկանությանը հաջողվել է պարզել, որ այդ երիտասարդը նախկինում երեք անգամ դատապարտված Արման Ռամազյանն է, ով ձերբակալված է որպես կասկածյալ: Միաժամանակ, ասվում էր, որ ոստիկանությունը առերեսում է կազմակերպել կասկածյալի և բռնաբարված կնոջ միջև: Հարևանների փոխանցմամբ` Ռոզա Մոսինյանը իրենց հետ զրույցում ասել է, որ իրեն բռնաբարողն ու թալանողը ուրիշ երիտասարդ է, այլ ոչ ոստիկանության հայտնաբերածը, մինչդեռ ձերբակալված Արման Ռամազյանն իր հերթին հակառակն է պնդում` ասելով, որ ինքն է կողոպտել ու բռնաբարել ծեր կնոջը: Որոշ աղբյուրների փոխանցմամբ` պատճառն այն է, որ ոստիկանական բաժանմունքում տղային այնքան են ծեծել, որ նա իր մեղքն ընդունի: Ի դեպ, նշված հանցագործությունը կատարելու մեջ կասկածվող երիտասարդը նոր է ազատվել կալանավայրից: Դեպքի առթիվ հարուցվել է քրեական գործ ՀՀ քրեական օրենսգրքի 138-րդ հոդվածի 2-րդ մասի հատկանիշներով:
Երեկ մենք զրուցեցինք Լոռու մարզի քննչական բաժնի պետ Գագիկ Իսպիրյանի հետ, ով տեղեկացրեց, որ ձերբակալված երիտասարդն ազատ է արձակվել: «Աշխատում ենք նոր ապացույցներ ձեռք բերելու ուղղությամբ»,- տեղեկացրեց Գագիկ Իսպիրյանը: Մեր այն դիտարկմանը, թե ստացվում է, որ տվյալ երիտասարդը չի եղել բռնաբարողը, պարզաբանեց. «Կասկածանքով ձերբակալել էինք, բայց քանի որ բավարար ապացույցներ ձեռք չբերեցինք որպես մեղադրյալ ներգրավելու համար, ազատ արձակեցինք: Նախաքննությունը այդ ուղղությամբ շարունակվում է, փորձաքննություն ենք նշանակել, որը հնարավոր է, մեզ տա ապացուցողական նշանակության փաստեր»: Գագիկ Իսպիրյանը ևս մեզ հետ զրույցում հաստատեց, որ տիկին Ռոզան մինչև բռնաբարությունը կույս չի եղել, քանի որ ամուսնացած է եղել:
Մենք փորձեցինք զրուցել նաև տիկին Ռոզայի հետ, սակայն մեզ խորհուրդ տվեցին նրան առայժմ չանհանգստացնել` հաշվի առնելով նրա տարիքը և հոգեբանական ապրումները: Չնայած ներկա պահին իրեն լավ է զգում, սակայն կատարվածից հետո դեռ ամաչում է խոսել և շփվել մարդկանց հետ: Միայն այդ տարիքում կատարվածի մասին բարձրաձայնելն ու ոստիկանությանը հաղորդելն էլ իր կողմից մեծ հերոսություն և համարձակություն էր, քանի որ նման իրավիճակում հայտնված երիտասարդները, այն էլ մարզերի, աշխատում են ծածուկ պահել կատարվածը: Չնայած հարևանության շրջանում նաև խոսակցություններ են շրջանառվում, որ տիկին Ռոզան ոչ թե բռնաբարության, այլ կողոպուտի համար է դարդ անում: