Այսօր Աղվերանում ՏՏ ոլորտի լիդերները քննարկում են այդ ոլորտի բարեփոխման ծրագիրը, մասնավորապես՝ Երևանի Ճարտարագիտական համալսարանի բարեփոխման հայեցակարգը և Հայաստանում տեխնոլոգիական ձեռներեցության առաջնային զարգացման առաջարկությունները, որոնք ներկայացվելու են Սերժ Սարգսյանին:
Ինֆորմացիոն տեխնոլոգիաների ձեռնարկությունների միության նախագահ Հովհաննես Ավոյանը նշեց, որ իրենց նպատակը տեխնոլոգիական համալսարանի ստեղծումն է, որը ոլորտի համար որակյալ աշխատաշուկա կապահովի. «Կոնցեպցիայի վրա բավականին երկար ենք աշխատել, քննարկել, թե ինչպես կարող ենք աջակցել համալսարանին, իսկ համալսարանը՝ բիզնեսին»:
Ձեռնարկությունների ինկուբատոր հիմնադրամի տնօրեն Բագրատ Ենգիբարյանը ներկայացրեց համալսարանի բարեփոխման հայեցակարգը: Նա նշեց, որ ներկայում Հայաստանում ՏՏ ոլորտում աշխատում է 5,500 մարդ, եթե ավելացնենք հեռահաղորդակցությունը` 10,000 մարդ, ինչը մրցակցում է հանքարդյունաբերության հետ, որտեղ զբաղվածների թիվը 12 հազար է, սակայն Բ.Ենգիբարյանը ընդգծեց, որ ավելացված արժեքի ստեղծման առումով ՏՏ-ն առաջ է անցել հանքարդյունաբերությունից և ադամանդագործությունից: Նա նշեց, որ ճարտարագիտական ոլորտը հետ է մնում ՏՏ-ից: «Տարեկան ՏՏ և հարակից մասնագիտություններով սովորում է 1,600 ուսանող, սակայն դրա 30-40 տոկոսը գնում է այլ ոլորտներ: Ընդ որում՝ երկրում գերազանցիկների 70 տոկոսը գնում է տնտեսագիտական ֆակուլտետ, երիտասարդներին ուղղորդելու խնդիր կա»,- շեշտեց Ենգիբարյանը՝ հավելելով, որ դաշտում տարեկան 2 հազար մասնագետի պահանջարկ կա, բայց մի կերպ բավարարվում է 1,500-ը:
Համաշխարհային բանկի փորձագետ Սեզար Ջամանը ներկայացրեց բարձրագույն կրթության ինովացիոն հիմնադրամի ստեղծման նախագիծը:
Ֆորումի ընթացքում նախատեսվում է նաև ծրագրերի շուրջ դոնոր կազմակերպությունների ժողով, իսկ վաղը տեղի կունենա նորաստեղծ տեխնոլոգիական ընկերությունների ասոցիացիայի հիմնադիր համագումարը: Ֆորումին մասնակցում են ոլորտի ընկերություններ, էկոնոմիկայի փոխնախարար Վահե Դանիելյանը, ԵՊՃՀ ռեկտոր Արա Ավետիսյանը և միջազգային կազմակերպությունների ներկայացուցիչներ:
