Պաշտոնական Բաքուն դիտարկում է Եվրախորհրդից Ադրբեջանի դուրս գալու ընթացակարգը:
Այս մասին հայտնում է ադրբեջանական ԱՊԱ գործակալությունը՝ վկայակոչելով Ադրբեջանի կառավարությունից իր աղբյուրները։
«Չնայած ԵԽԽՎ երեկվա նիստում նշվել է, որ ադրբեջանական պատվիրակության լիազորությունների սահմանափակումը չի նշանակում Ադրբեջանի մասնակցության դադարեցում ԵԽ մյուս կառույցներում, սակայն Բաքուն այլ դիրքորոշում ունի։ Ստացված տեղեկատվության համաձայն՝ Ադրբեջանը մտադիր չէ համակերպվել այս անարդար և կողմնակալ վերաբերմունքի հետ և ներկայումս քննարկում է ոչ միայն ԵԽԽՎ-ից, այլև ամբողջ Եվրոպայի խորհրդից դուրս գալու ընթացակարգը: Ադրբեջանը կարող է նաև հրաժարվել Մարդու իրավունքների եվրոպական դատարանի իրավասությունը ճանաչելուց»,- նշվում է հաղորդագրության մեջ:
Նախօրեին ԵԽԽՎ պատգամավորները հրաժարվել էին վավերացնել ադրբեջանական պատվիրակության լիազորությունները՝ այդ երկրի կողմից Եվրախորհրդի առջեւ ստանձնած պարտավորությունները չկատարելու պատճառով։ Այս որոշումից հետո, ընթացակարգային կանոնների համաձայն, Բաքուն չի կարողանա մասնակցել ԵԽԽՎ աշխատանքներին առնվազն մեկ տարի՝ մինչև հաջորդ ձմեռային նստաշրջանը։
Միևնույն ժամանակ, բանաձևում ընդունված փոփոխությունը նախատեսում է, որ ադրբեջանական պատվիրակությունը կարող է վերսկսել իր աշխատանքը, երբ կանոնակարգով նախատեսված պայմանները կատարվեն։
